ბოლო ხუთ წელში თბილისში ბინები 58%-ით გაძვირდა

2026 წლის მაისში თბილისში 3 787 საცხოვრებელი ბინა გაიყიდა. „ქოლიერსის“ ბაზრის მიმოხილვის თანახმად, ბინების ტრანზაქციები წლიურად 13.1%-იან ზრდას აჩვენებს.

აღსანიშნავია, რომ საანგარიშო პერიოდში გაზრდილია საცხოვრებელი ბინების ფასები როგორც ახალ, ასევე ძველ პროექტებში.

კერძოდ, მაისში დედაქალაქის მასშტაბით ძველ პროექტებში საცხოვრებელი ბინების ფასები 16%-ით არის გაზრდილი, ეს კი მაშინ, როცა ახალ პროექტებში პირველად ბაზარზე ღირებულება 14.9%-იან, ხოლო მეორეულ ბაზარზე 5.5%-იან მატებას აჩვენებს.

ბოლო ხუთ წელში თბილისში ბინები 58%-ით გაძვირდა

"ქოლიერსის“ 2022-2026 წლის მონაცემები მაისის ჭრილში აჩვენებს, რომ ბინები 58%-ით არის გაძვირებული.

უფრო კონკრეტულად, 2022 წლის მაისში 1 კვ.მ-ის საშუალო შეწონილი გასაყიდი ფასი დედაქალაქში 817 დოლარს შეადგენდა, უკვე 2026 წლის მაისისთვის ფასები 1291 დოლარამდეა გაზრდილი.

აღსანიშნავია, რომ 5-წლიან ჭრილში 89.6%-ით არის გაზრდილი საცხოვრებელი უძრავი ქონების ბაზრის ზომა. მაგალითისთვის, 2022 წლის საანგარიშო თვეში ბაზრის ზომა 176 მლნ აშშ დოლარს შეადგენდა, 2026 წლის მაისისთვის კი 333.8 მლნ აშშ დოლარამდეა გაზრდილი.