რუსეთის ნადირობა ქართველ სამხედროებზე გრძელდება
რუსეთი ქართველ ჯარისკაცებზე ნადირობს - კრემლი ცდილობს, საქართველო-რუსეთის ომის მონაწილეები ხელში ჩაიგდოს და სამაგალითოდ დასაჯოს. განსაკუთრებულ ინტერესს კი მისთვის ის სამხედროები წარმოადგენენ, რომლებიც დღესაც პუტინის წინააღმდეგ იბრძვიან, ამჯერად უკვე უკრაინის მიწაზე.
აგვისტოს ომის გმირმა, ზაზა ბერიანიძემ რამდენიმე დღის წინ გაიგო, რომ რუსეთი მას ეძებს და ახლა საკუთარი ძალებით არკვევს, გამოაცხადა თუ არა უკვე საერთაშორისო ძებნა ინტერპოლმა. ბერიანიძის წინააღმდეგ რუსეთში საქმე აგვისტოს ომის გამო აღიძრა.