„მხოლოდ მაშინ, როდესაც დაღუპვის კარსა ვართ მიმდგარი, ვდგებით ერთად და ვერთიანდებით!“ - მერაბ კოსტავა ქართველი ხალხის შესახებ

"საუბედუროდ, ჩვენ ქართველები, მხოლოდ გადამწვეტ მომენტში, მაშინ, როდესაც დაღუპვის კარსა ვართ მიმდგარი, ვდგებით ერთად და ვერთიანდებით! ხოლო რაც შეეხება შემდგომ ეტაპს, როდესაც უკვე ერის გადარჩენაზე კი არ არის აქ ლაპარაკი, არამედ აღორძინებაზე, იქ კი, ისევ თავს იჩენს ჩვენი პრომეთეული გოროზობა, ჩვენი ეს ოდითგანდელი სენი და ჩვენ კვლავ - ერთმანეთს ვშორდებით!" - მერაბ კოსტავა.

ქართველი დისიდენტი, ეროვნული მოძრაობის ლიდერი, პოეტი, მუსიკათმცოდნე, მერაბ კოსტავა 1939 წლის 26 მაისს თბილისში, ოლღა დემურიასა და ივანე კოსტავას ოჯახში დაიბადა. ბაბუა – ვლადიმერ დემურია ცნობილი საზოგადო მოღვაწე და მასწავლებელი იყო.

1972 წელს მერაბ კოსტავამ  ზვიად გამსახურდიასთან ერთად საქართველოში „ადამიანის უფლებათა დაცვის საინიციატივო ჯგუფი“ ჩამოაყალიბა. 1977 წლის 7 აპრილს მერაბ კოსტავა ანტისაბჭოთა აგიტაციისა და პროპაგანდისთვის დააპატიმრეს და 3 წლით პატიმრობა მიუსაჯეს.

მერაბ კოსტავა, ზვიად გამსახურდიასთან ერთად, 1987-1990 წლებში გამართული თითქმის ყველა საპროტესტო აქციის, გაფიცვის, შიმშილობის, მიტინგისა თუ დემონსტრაციის ორგანიზატორი იყო. „შავლეგოდ“ წოდებული მერაბი 9 აპრილის ღამეს ერთგულად იდგა ხალხის გვერდით. 1989 წლის 9 აპრილს მერაბ კოსტავა კვლავ დააპატიმრეს, მიტინგის ორგანიზების საბაბით.

საქართველოს დამოუკიდებლობისთვის მებრძოლი მერაბ კოსტავა ბევრჯერ იყო რეპრესირებული, დაპატიმრებული, გადასახლებული. ბოლოს 1987 წელს დაბრუნდა გადასახლებიდან და ზვიად გამსახურდიასთან ერთად განაგრძო ბრძოლა სამშობლოს დამოუკიდებლობისთვის. მერაბ კოსტავა 1989 წლის 13 ოქტომბერს, სოფელ ბორითთან დაიღუპა. ის მაშინ 50 წლის იყო.

1991 წლის 31 მარტს საქართველომ ჩაატარა რეფერენდუმი დამოუკიდებლობის აღდგენის თაობაზე. წიგნში „79 ამბავი“ თამაზ ვაშაძე იხსენებს, რომ რეფერენდუმის შემდეგ მის სახლში სუფრა გაიშალა, თამადა ზვიად გამსახურდია იყო.

„წვეულების დასასრულს, როდესაც სტუმრები უკვე გვემშვიდობებოდნენ, ზვიად გამსახურდიას ვთხოვე ცარცით დაეწერა კედელზე რამე, რაც ჩემი ოჯახისთვის სამახსოვროდ დარჩებოდა. ბატონმა ზვიადმა შეასრულა ჩემი თხოვნა და კედელს მიაწერა:

„გაუმარჯოს დამოუკიდებელ საქართველოს! დიდება მერაბს!“