მიანმარში დამანგრეველი მიწისძვრის გამო დაღუპულია 2056 ადამიანი, 3 900-ზე მეტი დაშავებულია
მიანმარში დამანგრეველი მიწისძვრის გამო სამხედრო ხელმძღვანელობამ ერთკვირიანი გლოვა გამოაცხადა.
დღეს, ადგილობრივი დროით, 12:51 საათზე, ზუსტად იმ დროს, როდესაც 28 აგვისტოს 7,7 მაგნიტუდის ბიძგები დაფიქსირდა, ქვეყანაში წუთიერი დუმილი გამოცხადდა.
მიანმარში ამ დრომდე გრძელდება სამძებრო-სამაშველო სამუშაოები. ბოლო მონაცემებით, დაღუპულია 2056 ადამიანი, 3 900-ზე მეტი დაშავებულია, 270-ზე მეტი მოქალაქე კი დაკარგულად ითვლება.
ქალაქ მანდალაიში, რომელიც ეპიცენტრის სიახლოვეს მდებარეობს, ათასობით ადამიანი უსახლკაროდ არის დარჩენილი ან ბიძგების განმეორების შიშით საცხოვრებელში ვერ ბრუნდება. ქალაქის მთავარი საავადმყოფოდან ევაკუირებული არიან პაციენტები. გაერო-ში აცხადებენ, რომ დაზიანებული გზებისა და კრიტიკული ინფრასტრუქტურის გამო სამძებრო-სამაშველო ოპერაცია ფერხდება.
ამასთან, მიწისძვრის შედეგად 19 ადამიანია დაღუპული ტაილანდის დედაქალაქ ბანგკოკში. სამძებრო-სამაშველოო ოპერაცია გრძელდება სტიქიის შედეგად ჩამონგრეულ მშენებარე ცათამბჯენის ადგილას. ადგილობრივი ხელისუფლების ვარაუდით, ნანგრევებში 70-ზე მეტი ადამიანია მოყოლილი.
