მეორე ფრონტთან დაკავშირებით მოწოდებები არ წყდება - რას ამბობს ირაკლი კობახიძე?
პარტია „ქართული ოცნების“ თავმჯდომარემ, ირაკლი კობახიძემ განაცხადა, რომ საქართველოში, მეორე ფრონტის შექმნასთან დაკავშირებით მოწოდებები არ წყდება.
კობახიძე გამოეხმაურა უკრაინის საგარეო საქმეთა სამინისტროს განცხადებას, რომლის მიხედვითაც, უკრაინის საგარეო საქმეთა მინისტრის მოადგილემ იმედი გამოთქვა, რომ საქართველოც შეუერთდება იმ პარტნიორთა წრეს, რომლებიც უკრაინას აწვდიან იარაღსა და სამხედრო აღჭურვილობას.
ირაკლი კობახიძის თქმით, სამწუხაროა, როდესაც კრაინის ხელისუფლების წარმომადგენლები ასეთ მოწოდებებს აკეთებენ.
„მეორე ფრონტთან დაკავშირებით მოწოდებები არ წყდება. ამას ხან პირდაპირი ფორმით აკეთებენ, ხან ირიბი ფორმით. რა თქმა უნდა, უკრაინისთვის ნებისმიერი იარაღის მიწოდება სამხედრო კონფლიქტში პირდაპირ ჩართვას ნიშნავს, რასაც ჩვენ ვერ დავუშვებთ. ძალიან სამწუხაროა, როდესაც უკრაინის ხელისუფლების წარმომადგენლები ასეთ მოწოდებებს პრაქტილულად, ღია ფორმით აკეთებენ. რა თქმა უნდა, ეს სერიოზული პრობლემაა. უკრაინელო ხალხი არის ჩვენი მეგობარი ხალხი, მაგრამ სამწუხაროდ, უკრაინის ხელისუფლება არ მოქმედებს ისე, როგორც ეს შეშვენის მეგობარი სახელმწიფოს პარტნიორ ხელისუფლებას“, – განაცხადა ირაკლი კობახიძემ.
ამასთან, კობახიძემ შეაფასა უკრაინის საგარეო საქმეთა სამინისტროს განცხადების ის ნაწილიც, სადაც აღნიშნულია, რომ უკრაინის საგარეო საქმეთა მინისტრის მოადგილე იმედოვნებს, თბილისი შეუერთდება ევროკავშირის მიერ აგრესორი სახელმწიფოს წინააღმდეგ დაწესებულ ყველა სანქციას.
ირაკლი კობახიძის განაცხადებით, კონკრეტული მონაცემებით მტკიცდება, რომ საქართველოს მხრიდან სანქციებისთვის გვერდის ავლა არ ხდება.
„რაც შეეხება სანქციების გვერდის ავლას, ჩვენ უამრავი ფაქტი წარმოვადგინეთ იმასთან დაკავშირებით, რომ ყველა საპირისპირო განცხადება არის სრული სიცრუე, სრული „ფეიკი“ და ეს მტკიცდება კონკრეტული მონაცემებით, მტკიცდება მათ შორის სტატისტიკით. ვერც ერთი ფაქტი, რომელზეც მათ ჰქონდათ საუბარი, ვერ დაადასტურეს. ეს ყველაფერი მიუთითებს იმაზე მიუთიტებს, რომ მოტივი აქაც პოლიტიკურია. მათ სურთ რაიმე ფორმით საქართველოს ჩართვა სამხედრო კონფლიქტში. ამას ცდილობენ ხან პირდაპირი მოწოდებებით, ხან
ირიბი განცხადებებით, ხან ტყუილის გავრცელებით, რომელიც ამ შემთხვევაში, უკავშირდება სანქციებისთვის გვერდის ავლას. რა თქმა უნდა, ეს არ არის კორექტული
ფორმა, როდესაც საქმე ეხება პარტნიორ ქვეყანასთან ურთიერთობას“, – განაცხადა კობახიძემ.
