კაცს, რომელმაც პნევმატური იარაღით ძაღლი მოკლა, გირაო შეეფარდა
პროკურატურამ ცხოველისადმი სასტიკი მოპყრობის ფაქტზე, ერთ პირს ბრალდება წარუდგინა.
"შინაგან საქმეთა სამინისტროს მიერ ჩატარებული გამოძიებით დადგინდა, რომ 22 იანვარს, ბათუმში, ბრალდებულმა პნევმატური იარაღით დაზიანებები მიაყენა მიუსაფარ ძაღლს, რის შედეგადაც ცხოველი დაიღუპა.
ბრალდებულს ბრალდება საქართველოს სისხლის სამართლის კოდექსის 259-ე მუხლის პირველი ნაწილით წარედგინა (ცხოველის წამება ან მისდამი სასტიკი მოპყრობა, რამაც მისი დაღუპვა ან დასახიჩრება გამოიწვია), რაც სასჯელის სახედ და ზომად ერთ წლამდე თავისუფლების აღკვეთას ითვალისწინებს.
პროკურატურის შუამდგომლობის საფუძველზე სასამართლომ ბრალდებულს აღკვეთის ღონისძიების სახით გირაო შეუფარდა", - აცხადებს პროკურატურაში.
შეგახსნებთ, ბათუმში, 6 მაისის პარკში, სასტიკად მოკლული ძაღლი იპოვეს. ინფორმაცია სოციალურ ქსელში ცხოველთა უფლებადამცველმა, თეონა ყურშუბაძემ გაავრცელა.
