"უნდა ვიომოთ, როცა სხვანაირად შეუძლებელია, როცა ომს გვაძალებენ, ეს ჩვენს ინტერესებს არ ემსახურება" - მამუკა მდინარაძე
"ქართული ოცნების" წევრი, მამუკა მდინარაძე სოციალურ ქსელში საქართველოს შესახებ წერს.
მისი თქმით, ომი საქართველოს მომავლის ინტერესებს არ ემსახურება.
"პატარა და ძალიან ამაყი ერი ვართ.
პატარა და ძალიან ლამაზი ქვეყანა გვაქვს.
ჩვენი ისტორია სამშობლოსა და ღირსების შენარჩუნების, გადარჩენისთვის ბრძოლაა.
სულ ბრძოლა გვიწევდა. დღესაც ვიბრძვით და მომავალშიც მოგვიწევს!..
ომი სამხედრო ძალადობა და დიდი ტრაგედიაა. ის ვიღაცისთვის პოლიტიკის გაგრძელება, ჩვენნაირი ქვეყნებისთვის კი უკიდურესი აუცილებლობაა. საჭიროების შემთხვევაში უნდა ვიომოთ კიდეც, სისხლის უკანასკნელ წვეთამდე, როგორც ამას ჩვენი წინაპრები აკეთებდნენ!
მაგრამ როდის არის ეს საჭიროების შემთხვევა თუ უკიდურესი აუცილებლობა?!
უნდა ვიომოთ მაშინ, როცა სხვანაირად სამშობლოს, ღირსების თუ უბრალოდ, ფიზიკური გადარჩენა შეუძლებელია.
ხოლო როცა გადარჩენის გზა სულ სხვაგვარია და ომს გვაძალებენ, უნდა ვიცოდეთ, რომ ეს ომი ჩვენი და ჩვენი მომავლის ინტერესებს არ ემსახურება!", - წერს მამუკა მდინარაძე.
