„უცხოური გავლენის აგენტებთან“ დაკავშირებულ კანონს პრეზიდენტი ვეტოს დაადებს
პრეზიდენტი, სალომე ზურაბიშვილი კანონს “უცხოური გავლენის გამჭვირვალობის შესახებ“ ვეტოს დაადებს.
"კატეგორიულად წინააღმდეგი ვარ იმ კანონის, რომელიც ახლა იხილება. არ შევალ ამ კანონის განხილვაში, ვეტოს ყოველ შემთხვევაში დავადებ. მე არ მაქვს სამართლებრივი პოზიციები, რომ ის მუხლი, ან ეს მუხლი არ ვარგა. ეს კანონი პირდაპირ არის მიღებული იმისთვის, რომ დაგვაშოროს ევროპისგან და ამდენად, ჩემთვის არის მიუღებელი", - განაცხადა პრეზიდენტმა გენდერული თანასწორობის ყოველწლიურ პოლიტიკურ ფორუმზე სიტყვით გამოსვლისას.
ცნობისთვის, „ხალხის ძალის“ მიერ შეთავაზებული კანონით, უცხოური გავლენის გამჭვირვალობის უზრუნველყოფის მიზნით, შეიქმნება უცხოური გავლენის აგენტების რეესტრი, სადაც დარეგისტრირდება ყველა ის არასამეწარმეო იურიდიული პირი და მედიასაშუალება, რომელთა შემოსავლების 20 პროცენტზე მეტი ფინანსდება უცხოური ძალების მიერ.
