აგენტების რეგისტრაციაზე კანონპროექტი პროპუტინისტურია, არ მჯერა, რომ ამას მიიღებენ - იაგო ხვიჩია
„გირჩის“ დეპუტატმა, იაგო ხვიჩიამ განაცხადა, რომ აგენტების რეგისტრაციის კანონპროექტი პროპუტინისტურია.
ხვიჩია თვლის, რომ ხელისუფლებას სურს პროპუტინისტური კანონებით გადაფაროს ის, ცვლილება რომელსაც თავდაცვის კოდექსი ითვალისწინებს და რომლის თანახმად, სასულიერო პირები სამხედრო სამსახურში გაწვევის გადავადების უფლებით ვეღარ ისარგებლებენ.
„ეს პროპუტინისტური კანონპროექტია, ამას არ მიიღებენ და ეს ჯარის რეფორმის თემიდან ყურადღების გადასატანად არის. ამას პირველი მოსმენით მიიღებენ და ვენეციის კომისიაში გადააგზავნიან და შემდეგ მისი ბედი გაუგებარი იქნება. მე დღემდე არ მგონია, რომ ამას მიიღებენ, უბრალოდ მათთვის მნიშვნელოვანი თემიდან რომ ნაკლებად მნიშვნელოვანზე გადაეტანათ ყურადღება და ჟურნალისტებზე და NGO-ებზე ელაპარაკათ ნაცვლად წვევამდელებისა, ამიტომ მოხდა ეს. კანონპროექტი შეგნებულად არის პროპუტინისტური, რომ ამას დისკუსია გამოეწვია. თუ ამ კანონს მიიღებენ მასზე ვეტო, რა თქმა უნდა, დასადებია, მაგრამ მე არ მჯერა, რომ ამ კანონს მიიღებენ, ვენეციის კომისიაში გააგზავნიან და წავა ეს კანონი მოუსავლეთში, მაგრამ ამ დროს ჩავლილი იქნება ჯარის რეფორმა და თქვენს ოპერატორებს, შეყვარებულებს, საყვარლებს იძულებით წაასხამენ ჯარში”,- განაცხადა ხვიჩიამ.
შეგახსენებთ, რომ პარლამენტში „ხალხის ძალის“ მიერ უცხოური გავლენების შესახებ ორი კანონპროექტია ინიცირებული - "უცხოური გავლენის გამჭვირვალობის შესახებ" და „უცხოელი აგენტების რეგისტრაციის შესახებ“.
„უცხოელი აგენტების რეგისტრაციის შესახებ“ კანონის პროექტის ავტორები უმრავლესობაში შემავალი "ხალხის ძალის" დეპუტატები: - სოზარ სუბარი, დიმიტრი ხუნდაძე, მიხეილ ყაველაშვილი, გურამ მაჭარაშვილი, დაჩი ბერაია და ვიქტორ ჯაფარიძე არიან.
პროექტის გათვალისწინებით, უცხოეთის აგენტად რეგისტრაციის ვალდებულება ნებისმიერ ფიზიკურ და იურიდიულ პირს ექნება, რომელიც დაფინანსებას უცხოეთიდან იღებს. "უცხოელი აგენტების რეგისტრაციის შესახებ" კანონით გათვალისწინებული ვალდებულების შეუსრულებლობა ან არაჯეროვნად შესრულება, სისხლის სამართლის პასუხისმგებლობას იწვევს და იქნება დასჯადი ჯარიმით ან თავისუფლების აღკვეთით - ვადით 5 წლამდე.
