"ამას პროვოკაციის სუნი ასდის და თან, ეს ბიჭები აქამდე არ ჩანდნენ წინა პლანზე..." - ლაშა ბერულავა აქციის ორგანიზატორებს მიმართავს
ჟურნალისტი, ლაშა ბერულავა თბილისში მიმდინარე აქციას ეხმაურება და ორგანიზატორებს, სავარაუდოდ, პროვოკატორების შესახებ აფრთხილებს, რომლებიც სპეცრაზმელების წინააღმდეგ პროვოკაციულ ქმედებებს სჩადიან.
"აქციის ორგანიზატორებმა სასწრაფოდ უნდა მოაცილონ ტერიტორიას სახედაფარული, აგრესიული პირები, რომლებიც ბოლო პერიოდში გააქტიურდნენ და სპეცრაზმელების მისამართით აგურებს (!) და ქვებს ისვრიან, ასევე გენიტალიებს და შუათითს უჩვენებენ. ამას პროვოკაციის სუნი ასდის და თან, ეს ბიჭები აქამდე არ ჩანდნენ წინა პლანზე...", - წერს ბერულავა.
თბილისში, საკანონმდებლო ორგანოსთან აქცია მიმდინარეობს. ვითარება პარლამენტთან მას შემდეგ გამწვავდა, რაც "ოცნებამ" ე.წ. აგენტების შესახებ კანონი პირველი მოსმენით მიიღო.
