ევროსაბჭოს სამედიცინო მისიის წევრებმა მიხეილ სააკაშვილი მოინახულეს
სამედიცინო მისიის 6-კაციანმა დელეგაციამ კლინიკა „ვივამედში“ ექსპრეზიდენტი, მიხეილ სააკაშვილი მოინახულა. მასთან ერთად მოინახულეს პენიტენციური დაწესებულებებიდან სამკურნალოდ გადმოყვანილი სხვა პაციენტებიც.
„ვივამედის“ კლინიკური დირექტორის, ზურაბ ჩხაიძის განცხადებით, სამედიცინო მისიის წევრებმა პატიმრები, მათ შორის, ექსპრეზიდენტი სააკაშვილი მოინახულეს და დეტალურად გაეცნენ პენიტენციური სამსახურიდან გადმოყვანილი პაციენტების ავადმყოფობის ისტორიებს, სამედიცინო დასკვნებს, კვლევებსა და დანიშნულებებს.
„გაეცნენ ავადმყოფობის ისტორიებს, გაეცნენ ყველა კვლევის შედეგებს, რაც მოითხოვეს, ყველაფრის საშუალება ჰქონდათ, რომ ენახათ. მათ შორის, სამედიცინო დასკვნაც, დანიშნულებაც, კვლევებიც და ასე შემდეგ. ყველა პატიმარი მოინახულეს“, - აცხადებს ზურაბ ჩხაიძე.
