„გავრცელებული ინფორმაცია, თითქოს, კომპანია ხელოვნურად ზრდის დაზიანებული ავტობუსის შეკეთების ღირებულებას, სრული სიცრუეა“ - თბილისის სატრანსპორტო კომპანია

თბილისის სატრანსპორტო კომპანია სოციალურ ქსელში ავტობუსის დაზიანების ფაქტისა და ზარალის ანაზღაურების შესახებ ერთ-ერთი მოქალაქის მიერ გავრცელებულ ინფორმაციაზე განცხადებას ავრცელებს. 

„გვსურს, გამოვეხმაუროთ სოციალურ ქსელში ერთ-ერთი მოქალაქის მიერ გავრცელებულ ინფორმაციას, რომელიც ავტოსაგზაო შემთხვევის შედეგად, მუნიციპალური ავტობუსის დაზიანების ფაქტსა და ზარალის ანაზღაურებას ეხება.

თბილისის სატრანსპორტო კომპანიის მფლობელობაში არსებული მუნიციპალური ავტობუსების სარემონტო სამუშაოებს შესაბამისი საგარანტიო ხელშეკრულების ფარგლებში, მწარმოებელი ორგანიზაციის მხრიდან ლიცენზირებული უფლებამოსილი კომპანიები ახორციელებენ. ამავე კომპანიების მიერ ხდება, როგორც ტექნიკური ნაწილების, ასევე, მომსახურების ღირებულების დადგენა.

ავტოსაგზაო შემთხვევის ადგილზე მიყენებული დაზიანების სრული იდენტიფიცირება შეუძლებელია პირველადი დათვალიერებისას და შესასრულებელი სარემონტო სამუშაოების სრული მოცულობის დადგენა ხდება ავტობუსის სერვისცენტრში გადაყვანის შემდეგ. როგორც კი შესაბამისი სამსახურის წარმომადგენლები მიყენებული ზარალის ოდენობას განსაზღვრავენ, დგება ინვოისი, რომლის საფუძველზეც, თბილისის სატრანსპორტო კომპანია ზარალის ანაზღაურებას ითხოვს.

სრული პასუხისმგებლობით ვაცხადებთ, რომ თბილისის სატრანსპორტო კომპანია ინვოისით განსაზღვრული შესრულებული სამუშაოების ღირებულებას არანაირ ფასნამატს არ ადებს და სოციალურ ქსელში გავრცელებული ინფორმაცია, თითქოს, კომპანია ხელოვნურად ზრდის დაზიანებული ავტობუსის შეკეთების ღირებულებას, არის სრული სიცრუე“ - აღნიშნულია განცხადებაში. 

ცნობისთვის, მოქალაქე, მამუკა კოწოწაშვილმა სოციალურ ქსელში გაავრცელა ინფორმაციას, ჯარიმის ოდენობაზე, რაც მან მიიღო ავტობუსთან ავარიის გამო.

"დღეს მომივიდა შეტყობინება ავტობუსზე მიყენებული ზიანის ანაზღაურება 9861,34 ლარი. უბრალოდ, გაოგნებული დავრჩი. 1 თვის წინ, შუქნიშანზე გავჩერდი ამ ავტობუსის უკან, აინთო მწვანე, დაიძრა ავტობუსი, დავძარი ავტომობილი მეც და იმწამსვე გააჩერა და უკანა ბუფერზე 3 კილომეტრი სიჩქარით უბრალოდ მივედე. მძღოლმა მითხრა, ჩემწინაც გააჩერა ვიღაცამ, რა ჩემი ბრალიაო. კარგი, კი ბატონო, ჩემი ბრალია, თუმცა გასაგები მომენტია, რადგან დაძრა და გააჩერა ეგრევე. პატრულმა დამიწერა ავარიის გამო ჯარიმა, უფრო მთავარი მერეა - შეხედეთ სურათებს დაზიანება ჩანს, მხოლოდ შუა ნაწილია ბუფერის ოდნავ შეღუნული, კარგ ხარისხიან სერვის ცენტრში ამის გაკეთება მაქსიმუმ რამდენი უნდა დაჯდეს 500 ? 700 ? 1000 თქვი ყველაზე მეძვირესთან. თავად ნაწილი სულ ახალიც არ ეღირება 1000 ლარი და მომდის შეტყობინება 9861 ლარი გადაიხადე თუ არადა გიჩივლებო, მადლობა თბილისის მერია, ასე რომ ექცევით მოქალაქეებს. ყველაზე უკანასკნელი ვიღაცა დამპალი სულის ხელოსანი ქვეყანაში ამ საქმეში თუ 200 ლარს მოგვატყუებს და მოგვიმატებს, თქვენ 8000 ლარს გვატყუებთ და გვიმატებთ, თუ არ გადაიხდი გიჩივლებო, ამასაც მყისიერად ამატებთ, უსისხლო ხალხი ხართ, ეს არის სუფთა გამომძალველობა, სახელმწიფოსგან ოფიციალური რეკეტი, გილოცავთ ხალხნო, ყველაზე უნამუსო ყაჩაღი და გამომძალველი სახელმწიფო გვაზის თავზე, ბრავო ! 

გააზიარეთ, ნახოს ყველამ რასთან გვაქ საქმე! ავტობუსს ახლოს არგაეკაროთ თორემ გაგპარსავენ კიარა ვისააქვს საერთოდ 10 000 ლარი და უდევს, პატარა 200-ლარიანი ზიანის გამო, 10000 ლარს მიგატანინებენ, ვალებს აგაღებინებენ, რა ენაღვლებათ, ეს არის ყაჩაღობა მეტი არაფერი! ამქვეყანას სახელმწიფო რომ ერქვას, უნდა გამოიძიოს შესაბამისმა სამსახურმა, მიაკითხოს კომპანიას და ნახოს ერთი რა დაუჯდა ამ პატარა ზიანის გამოსწორება, რომელიც არ აღემატება 200 ლარს და რატო ითხოვს სანაცვლოდ 10 000 ლარს !", - წერს მამუკა კოწოწაშვილი.