ქართულ ბაზარზე რუსული ნავთობის იმპორტის წილი 70%-მდე გაიზარდა - როგორი იყო მაჩვენებელი უკრაინის ომამდე?

რუსეთ-უკრაინის ომის შემდგომ ქართულ ბაზარზე რუსული ნავთობის და ნავთობპროდუქტების იმპორტის წილი 70%-მდე გაიზარდა.

კერძოდ, სტატისტიკის სამსახურის მონაცემებით, 2022 წლის იანვარ-თებერვალში საქართველოში განხორციელდა 162,746 მლნ დოლარის ღირებულების (204,362 ტონა) ნავთობპროდუქტების იმპორტი, რაშიც რუსული პროდუქტის წილი სულ რაღაც 14% იყო. შარშან 2 თვეში რუსეთიდან შემოვიდა 23,128 მლნ დოლარის ღირებულების ნავთობპროდუქტები (29,739 ტონა).

2023 წლის იანვარ-თებერვალში საქართველომ მსოფლიოში 158,355 მლნ დოლარის ღირებულების (196,491 ტონა) ნავთობი და ნავთობპროდუქტები შეიძინა, აქედან რუსეთში 108,575 მლნ დოლარის (149,195 ტონა) ანუ მთლიანი იმპორტის 68,5%.

რაც შეეხება მეორე მსხვილ იმპორტიორს - რუმინეთს, მისი წილი მთლიან იმპორტში შემცირდა. 2022 წლის 2 თვეში საქართველომ რუმინეთში 41,799 მლნ დოლარის ღირებულების (53,122 ტონა) ნავთობპროდუქტები იყიდა, 2023 წლის იანვარ-თებერვალში კი 23,442 მლნ დოლარის ღირებულების (27,218 ტონა).

მეზობელი აზერბაიჯანიდან კი საწვავის იმპორტი მინიმუმამდე დაეცა. თუ შარშან იანვარ-თებერვალში საქართველომ აზერბაიჯანში 27,450 მლნ დოლარის ღირებულების ნავთობი და ნავთობპროდუქტები იყიდა (36,879 ტონა), წელს 2 თვეში ეს მაჩვენებელი 1,885 მლნ დოლარამდე შემცირდა (1,682 ტონა). კლება 1 356%-ია.

წყარო: bm.ge