ვინ არის ბათუმში დაკარგული 19 წლის სტუდენტი? - ახალი დეტალები

ბათუმში გაუჩინარებული სტუდენტი, ინდოეთის მოქალაქე, 19 წლის ჯანარდან სინევა არის. მას უკვე მე-5 დღეა ეძებენ.

"რუსთავი2"-ის ინფორმაციით, სტუდენტი მეგობრებმა ბოლოს მის საცხოვრებელ სახლთან 5 დღის წინ, საღამოს 23:00 საათზე ნახეს. მეზობლები ამბობენ, რომ ბიჭს, სავარაუდოდ, მეგობართან კონფლიქტი ჰქონდა, რის შემდეგაც ის ბულვარის მიმართულებით წავიდა. სინევას გაუჩინარების შემდეგ ახლობლებმა მისი ძებნა დაიწყეს. მოგვიანებით, სანაპიროზე სტუდენტის მობილური ტელეფონი იპოვეს და შვილის გაუჩინარების შესახებ მამას შეატყობინეს.

გაუჩინარებამდე რამდენიმე დღით ადრე, ჯანარდან სინევა მეგობრებთან ერთად სანაპიროზე სეირნობდა. სტუდენტებს უცნაური არაფერი შეუნიშნავთ, თუმცა ამბობენ, რომ ბიჭს დეპრესია ჰქონდა, ბევრი მეგობარი არ ჰყავდა და არც პრობლემებზე საუბრობდა. 

19 წლის ჯანარდან სინევა ინდოეთის მოქალაქეა. ის ბათუმში, შოთა რუსთაველის სახელმწიფო უნივერსიტეტში, სამედიცინო ფაკულტეტის პირველ კურსზე სწავლობს. სასწავლო დაწესებულებაში ჯანარდან სინევას გაუჩინარების მიზეზებზე ვერ საუბრობენ. დეკანი ამბობს, რომ ბიჭი, 21 აპრილს ლექციაზე აღარ მივიდა, რის შემდეგაც უნივერსიტეტმა საგამოძიებო უწყებას მიმართა. 

ინდოეთის 19 წლის მოქალაქეს პოლიცია ამ დრომდე ეძებს. სამართალდამცველებმა უკვე ამოიღეს სათვალთვალო კამერების ჩანაწერები და გამოკითხეს სინევას მეგობრებიც. პოლიცია ადგენს სინევას გადაადგილების ტრაექტორიას.