ე.წ. ქოლ-ცენტრების საქმეზე, თბილისში დაწყებული სპეცოპერაცია დასრულებულია - რა ინფორმაცია ვრცელდება?

თბილისში, აღმაშენებლის გამზირის N 75-ში დაწყებული სპეცოპერაცია დასრულებულია. აღნიშნულ მისამართზე რამდენიმე საოფისე ფართია დალუქული.

ამ წუთებისთვის აღმაშენებლის გამზირზე საგამოძიებო უწყების წარმომადგენლები აღარ იმყოფებიან. არსებული ინფორმაციით, ოფისებიდან კომპიუტერული ტექნიკა და ელექტრო მოწყობილობებია ამოღებული.

სპეცოპერაცია გვიან ღამით ე.წ. ქოლ-ცენტრების საქმესთან დაკავშირებით დაიწყო. როგორც „ინტერპრესნიუსს“ საქართველოს ფინანსთა სამინისტროს საგამოძიებო სამსახურში განუცხადეს, უწყების თანამშრომლების მიერ მიღებული შეტყობინების საფუძველზე, შესაბამისი საპროცესო და საგამოძიებო მოქმედებები განხორციელდა. მათივე განმარტებით, მომხდართან დაკავშირებით გამოძიება გრძელდება.