საქართველოსთან პირდაპირ ავიარეისებზე აკრძალვის მოხსნამ ავიაბილეთებზე მოთხოვნა გააშვიდმაგა - რას წერს რუსული მედია?
პირდაპირი ფრენების აკრძალვის მოხსნის შემდეგ, რუსეთიდან საქართველოში ავიაბილეთებზე მოთხოვნა გაიზარდა. ამის შესახებ "რია ნოვოსტი“, ონლაინ მოგზაურობის დაჯავშნის სერვისებზე დაყრდნობით წერს.
"OneTwoTrip-ის ვებსაიტზე, სიახლეების გამოჩენიდან პირველ სამ საათში (12-დან 15 მაისამდე) ავიაბილეთებზე მოთხოვნა სამჯერ გაიზარდა შუადღის წინა პერიოდთან შედარებით, ხოლო მეზობელ ქვეყანაში სასტუმროს მაძიებელთა რაოდენობა გაიზარდა ერთნახევრით“ , - განაცხადეს კომპანიის პრესსამსახურში.
ახლა მოსკოვიდან თბილისის მიმართულებით ფრენის ღირებულება 14 ათასი რუბლიდან იწყება, ბათუმამდე - 25 ათასი რუბლიდან. დედაქალაქის სამვარსკვლავიან სასტუმროში ღამისთევის მინიმალური ღირებულებაა 1,4 ათასი რუბლიდან, საკურორტო ქალაქში - 3,2 ათასიდან.
Yandex.Travel სერვისის მომხმარებლებმა ახალი ამბების გამოჩენიდან პირველი ხუთი საათის განმავლობაში, შვიდჯერ უფრო ხშირად დაიწყეს საქართველოში ავიაბილეთების ძებნა. რუსების უმეტესობა დაინტერესებულია ზაფხულში საქართველოში ვიზიტით. ზაფხულისთვის ტრანსფერებით ფრენების ფასი ორმხრივი სამგზავრო დოკუმენტისთვის 40 ათასი რუბლიდან იწყება.
რუსული მედია წერს, რომ მომხმარებლები საქართველოში სასტუმროების დაჯავშნითაც გააქტიურდნენ და "თბილისი მოგზაურობისთვის ყველაზე პოპულარულ ქალაქად იქცა“.
ცნობისთვის, რუსეთმა საქართველოს მოქალაქეებისთვის სავიზო რეჟიმი გააუქმა. შესაბამისი განკარგულება რუსეთის პრეზიდენტმა ვლადიმერ პუტინმა გამოსცა. პუტინის განკარგულების თანახმად, სავიზო რეჟიმი 15 მაისიდან გაუქმდება. ვიზის გარეშე რუსეთის ტერიტორიაზე ყოფნის უფლება საქართველოს მოქალაქეებს 90 დღემდე ვადით შეეძლებათ. ამასთან, ვლადიმერ პუტინმა რუსული ავიაკომპანიებისთვის საქართველოში ფრენებზე აკრძალვაც მოხსნა.
წყარო: ambebi.ge
