„ასე რომ გაქებს ოკუპანტი სახელმწიფო, რომელთან ურთიერთობაზეც სრულიად ცივილიზებულმა სამყარომ უარი თქვა, მინიმუმ არ "ტეხავს?“ - ქაცარავა
ანტისაოკუპაციო მოძრაობის ლიდერი, დავით ქაცარავა რუსეთის მიერ საქართველოს მოქალაქეებისთვის სავიზო რეჟიმის გაუქმებას და ავიაკომპანიებისთვის საქართველოში ფრენებზე აკრძალვის მოხსნას ეხმაურება და სოციალურ ქსელში წერს.
„საგარეო საქმეთა მინისტრი გამოდის და ჩვენს მოსისხლე მტერს ისე ნაზად, ნარნარად და საყვარლად უწოდებს "ჩვენი ჩრდილოელი მეზობელიო", გეგონოს ჩვენ გვქონდეს რუსეთის 20%ოკუპირებული და ის გვეხვეწებოდეს ჩვენი ჯარების გაყვანას.
ამასობაში, გავრილოვმაც გვახარა, ჩამოვალო აუცილებლად, თინა კანდელაკი იძახის - "დაბრო პაჟალოვაწ" - და ამას ნიშნის მოგებით ამბობს - რუსეთში იყოსო კეთილი თქვენი მობრძანებაო, აქეთ მარგარიტა სიმონიანი გვაქებს, გასაკვირად კარგად იქცევაო საქართველოო.
ასე რომ გაქებს ოკუპანტი სახელმწიფო, რომლის პრეზიდენტი ჰააგის სასამართლოს მიერ დასაჭერთა სიაში არის შეყვანილი და რომელთან ურთიერთობაზეც სრულიად ცივილიზებულმა სამყარომ უარი თქვა, მინიმუმ არ ტეხავს?
მაგრამ თქვენზე შეგონება არ მუშაობს, თქვენ ხომ რუსის მონები ხართ და მხოლოდ რუსებს ემონებით, მათ ემორჩილებით და ფსონს, უკრაინაში რუსების გამარჯვებაზე დებთ .
თუ ფიქრობთ, რომ ეს მოღალატეობრივი პოლიტიკა და რუსებთან სიამტკბილობა შეგრჩებათ, ძალიან ცდებით.
დრონი მეფობენ და არა რუსქოცები“, - წერს ქაცარავა.
ცნობისთვის, რუსეთმა საქართველოს მოქალაქეებისთვის სავიზო რეჟიმი გააუქმა. შესაბამისი განკარგულება რუსეთის პრეზიდენტმა ვლადიმერ პუტინმა გამოსცა. პუტინის განკარგულების თანახმად, სავიზო რეჟიმი 15 მაისიდან გაუქმდება. ვიზის გარეშე რუსეთის ტერიტორიაზე ყოფნის უფლება საქართველოს მოქალაქეებს 90 დღემდე ვადით შეეძლებათ. ამასთან, ვლადიმერ პუტინმა რუსული ავიაკომპანიებისთვის საქართველოში ფრენებზე აკრძალვაც მოხსნა.
