ეს არის ჰუმანიტარული გადაწყვეტილება - დიმიტრი პესკოვი სავიზო რეჟიმის მოხსნასა და ფრენების აღდგენაზე
რუსეთის მიერ საქართველოს მოქალაქეებისთვის სავიზო რეჟიმის გაუქმებას და ავიაკომპანიებისთვის საქართველოში ფრენებზე აკრძალვის მოხსნას რუსეთის ფედერაციის პრეზიდენტის პრესმდივანი, დიმიტრი პესკოვი გამოეხმაურა და განაცხადა, რომ რუსეთის მხრიდან ეს ჰუმანიტარული გადაწყვეტილებაა.
„ეს არის ჰუმანიტარული გადაწყვეტილება. რუსეთის ხელისუფლება საკმაოდ დიდი ხნის განმავლობაში იღებდა მიმართვას ორივე ქვეყნის მოქალაქეებისგან, ორივე ქვეყნის მეწარმეებისგან, საზოგადოებრივი ასოციაციების, სამეცნიერო წრეებისგან, კულტურის მოღვაწეებისგან, რომლებიც ითხოვდნენ ამ გადაწყვეტილებების მიღებას და სწორედ ჰუმანიტარული მოსაზრებებიდან გამომდინარე გაკეთდა ეს“ , - განაცხადა პესკოვმა.
ამასთან, ჟურნალისტის კითხვაზე, როგორ აფასებს ქართველი პოლიტიკოსების, მათ შორის ქვეყნის პრეზიდენტის სალომე ზურაბიშვილის განცხადებას, რომელიც მკვეთრად გამოეხმაურა სავიზო რეჟიმის გაუქმებას, კრემლის წარმომადგენელმა აღნიშნა, რომ „გუშინ განსხვავებული რეაქცია იყო თბილისისგან: იყო ორივე - უარყოფითი, იყო ასევე თავშეკავებული“.
პესკოვს ასევე ჰკითხეს, შეიძლება თუ არა სავიზო რეჟიმის გაუქმება ორ ქვეყანას შორის დიპლომატიური ურთიერთობების აღდგენის წინაპირობად ჩაითვალოს, რაზეც მან უპასუხა, რომ ჯერჯერობით, ამ თემაზე კომენტარისგან თავს იკავებს.
