ჩვენ ვერ დავუწესებთ ჩვენს მოქალაქეებს დამატებით სასჯელს და სანქციას - ალუდა ღუდუშაური
ჩვენ არ და ვერ დავუწესებთ ჩვენი ქვეყნის მოქალაქეებს დამატებით სასჯელს და სანქციას, რაც ყველას უნდა ესმოდეს, – ამის შესახებ საპარლამენტო უმრავლესობის წევრმა, ალუდა ღუდუშაურმა საქართველო-რუსეთს შორის პირდაპირი ფრენების საკითხზე, ევროკავშირის უმაღლესი წარმომადგენლის, ჯოზეფ ბორელის პრესსპიკერის განცხადებაზე დასმული კითხვის პასუხად აღნიშნა.
ალუდა ღუდუშაურის განმარტებით, რუსეთმა თავად თქვა უარი იმაზე, რაც ცალმხრივად, სანქციის სახით ჰქონდა გამოყენებული.
„ყველა ობიექტური პირი, და ამ ყველაფერს თუ ჩვენ შინაარსობრივად ჩავუღრმავდებით, დავინახავთ, რომ საქართველოს არაფერი განუახლებია, საქართველომ რაც გააკეთა და რასაც აკეთებს, არის ის, რომ ჩვენ არ და ვერ დავუწესებთ ჩვენი ქვეყნის მოქალაქეებს დამატებით სასჯელს და სანქციას. ვფიქრობ, ეს ყველას კარგად უნდა ესმოდეს, უმარტივესი ჭეშმარიტებაა. არ მგონია, რომელიმე ქვეყანაში საკუთარი ხელისუფლება თუნდაც ერთ ადამიანს უქმნიდეს დამატებით ბარიერს, ჩვენ ამას უბრალოდ ვერ გავაკეთებთ, ეს ყველაფერი წარმოუდგენელია, არ ვიცი, რომელ დემოკრატიულ სტანდარტში უნდა ჯდებოდეს. ერთადერთი ბერკეტი გვაქვს, რომ აეროპორტებში წარმოდგენილი ვიყოთ საპოლიციო ქვედანაყოფებით, რომლებიც შეუზღუდავენ ჩვენს მოქალაქეებს პირდაპირი ფრენებით სარგებლობას.
ვფიქრობ, საქმე გვაქვს მარტივ მოცემულობასთან – რუსეთის ფედერაციას რაც ცალმხრივად სანქციის სახით ჰქონდა გამოყენებული, ამაზე რუსეთის ფედერაციამ თქვა უარი. სანქციის დაწესების და არც მისი მოხსნის დროს, ბუნებრივია, საქართველო არ და ვერ ჩაერეოდა. სხვა ყველაფერი მგონია, რომ სპეკულაციაა“, – აღნიშნა ალუდა ღუდუშაურმა.
რუსეთმა საქართველოსთან პირდაპირი ავიამიმიმოსვლა თბილისში ანტირუსული საპროტესტო გამოსვლების ფონზე 2019 წლის ზაფხულში შეაჩერა.
2008 წლის 7 აგვისტოს რუსეთ-საქართველოს მრავალწლიანი კონფლიქტი რუსეთის ღია სამხედრო აგრესიაში გადაიზარდა, რასაც ასეულობით ადამიანის მსხვერპლი, ეთნიკური წმენდა და რუსეთის მიერ საქართველოს ორი რეგიონის, აფხაზეთის და სამაჩაბლოს ოკუპაცია მოჰყვა.
