გმირთა მოედანზე გენო ადამიას ბიუსტი დაიდგა

გმირთა მოედანზე საქართველოს ეროვნული გმირის, გენერალ, გენო ადამიას ბიუსტი დაიდგა. ინფორმაციას თბილისის მერიის პრესსამსახური ავრცელებს.

ღონისძიებას დედაქალაქის მერი კახა კალაძე დაესწრო, რომელმაც ყვავილებით შეამკო საქართველოს ტერიტორიული მთლიანობისთვის დაღუპულ გმირთა მემორიალი და პატივი მიაგო მათ ხსოვნას.

"მნიშვნელოვანია, რომ ჩვენს შვილებს, მომავალ თაობას ჰქონდეს სრულყოფილი ინფორმაცია გმირების შესახებ. გენო ადამია იყო ღირსეული კაცი, გენერალ-მაიორი, რომელიც სოხუმის დაცემის შემდეგაც აგრძელებდა ბრძოლას 23-ე ბრიგადასთან ერთად. ის გმირულად დაეცა ამ ბრძოლაში. კიდევ ერთხელ, ქედს ვიხდი გმირების წინაშე. ჩვენს შვილებს კარგად უნდა ავუხსნათ, რას ნიშნავს ქვეყნის სიყვარული. როგორი ადამიანები იყვნენ ისინი და როგორ იცავდნენ სამშობლოს ღირსებას," განაცხადა კახა კალაძემ.

ცნობისთვის, გენერალმა, გენო ადამიამ 1993 წლის 27 სექტემბერს, სოხუმის დაცემის შემდეგაც უარი თქვა დანებებაზე და განაგრძო აფხაზი სეპარატისტებისთვის წინააღმდეგობის გაწევა. ის 28 სექტემბერს გმირულად დაეცა კელასურის ხიდზე.