"ღირსება ავტობუსი არ არის, რომ დააგვიანოს - ან დროულად და საჭირო ადგილას გაქვს, ან საერთოდ უმისოდ ცხოვრობ" - გია მურღულია
ფილოლოგი, გია მურღულია სოციალურ ქსელში ღირსების საკითხს ეხება და წერს, რომ ყოველი დღე ღირსებისაა.
"ღირსება ავტობუსი არ არის, რომ დააგვიანოს - ან დროულად და საჭირო ადგილას გაქვს, ან საერთოდ უმისოდ ცხოვრობ.
ვერავის მოხიბლავთ ფრაზით:
"დამელოდეთ, მალე კარგად მოქცევის შესაძლებლობა მექნება".
საქციელის სიმართლე თუ სინათლე ისევე უნდა მუდმივად თან გახლდეს, როგორც საკუთარი მზერა და გულისცემა.
ყოველი დღე ღირსებისაა, ღირსება - სიყვარულის, სიყვარული - ადამიანის და ადამიანი - ღმერთის.
ახლაც ასეთი დღე გაგვითენდა ყველას და ეს მშვენიერი დღეა - ის მხოლოდ ჩვენ გარეთ კი არა, ჩვენშიც თენდება.
დილა მშვიდობის, ქართველებო!", - წერს მურღულია.
