"ბრალდებული სისტემატურად ამყარებდა სქესობრივ კავშირს, ამცირებდა მას, აყენებდა შეურაცხყოფას, რის გამოც გოგონამ სიცოცხლე თვითმკვლელობით დაასრულა" - 15 წლის გოგოს სუიციდის ახალი დეტალები

11 ივნისს ბათუმში მომხდარ ტრაგედიასთან დაკავშირებით საქართველოს პროკურატურა განცხადებას ავრცელებს, რომელშიც სექსუალურ ძალადობაზეა საუბარი.

უწყების ცნობით, 16 წელს მიუღწეველ გოგონასთან აწ უკვე დაკავებული პირი სქესობრივ კავშირს ამყარებდა და მას შეურაცხყოფას აყენებდა.

"საქართველოს პროკურატურამ, 16 წლის ასაკს მუღწეველთან სქესობრივი კავშირის დამყარების და  თვითმკვლელობამდე მიყვანის  ფაქტზე ერთ პირს ბრალდება წარუდგინა. 

შინაგან საქმეთა სამინისტროს მიერ ჩატარებული გამოძიებით დადგინდა, რომ ბათუმში, ბრალდებული 16 წლის ასაკს მუღწეველ დაზარალებულთან სისტემატურად ამყარებდა სქესობრივ კავშირს. ასევე სისტემატურად ამცირებდა მას, აყენებდა სიტყვიერ შეურაცხყოფას და ლახავდა მის პატივსა და ღირსებას, რის გამოც 11 ივნისს, დაზარალებულმა საცხოვრებელი კორპუსის მე-15 სართულიდან გადმოხტომით სიცოცხლე თვითმკვლელობით დაასრულა.

სამართალდამცველებმა ბრალდებული 13 ივნისს დააკავეს. მას ბრალდება საქართველოს სისხლის სამართლის კოდექსის 115-ე მუხლის  მეორე ნაწილის ,,ა’’ ქვეპუნქტით (თვითმკვლელობამდე მიყვანა გენდერის ნიშნით) და 140-ე მუხლის პირველი ნაწილით (სრულწლოვნის მიერ სქესობრივი კავშირის დამყარება წინასწარი შეცნობით 16 წლის ასაკს მიუღწევლთან) წარედგინა. 

პროკურატურა ბრალდებულისთვის აღკვეთის ღონისძიების სახით, პატიმრობის გამოყენების მოთხოვნით, ბათუმის საქალაქო სასამართლოს  კანონით დადგენილ ვადაში მიმართავს.სისხლის სამართლის საქმეზე გამოძიება გრძელდება", - აღნიშნულია გავრცელებულ განცხადებაში.

შეგახსენებთ, 15 წლის მოზარდი 11 ივნისს, საცხოვრებელი კორპუსიდან გადმოვარდა და მანქანას დაეცა. ის მძიმე დაზიანებებით, კლინიკაში მეორე დღეს გარდაიცვალა.