"სიმართლეს არ შეესაბამება ინფორმაცია, თითქოს ..." - 11 წლის მარიამის დედა განცხადებას ავრცელებს

დიდ დიღომში მცხოვრები 11 წლის მარიამის დედა მიმართვას ავრცელებს და საზოგადოებას თანადგომისთვის მადლობას უხდის.

"ჩვენი მარიამი კარგადაა! სახლშია, მშობლებთან და საკუთარ და-ძმასთან ერთად! მადლობა უფალს!

მადლობა თქვენ, კეთილო ადამიანებო, ვინც  გულთან ასე მიიტანეთ ჩვენი ოჯახის ამბავი!

მესმის, ძალიან დიდია დაინტერესება თუ რა მოხდა, რა გახდა მიზეზი, რომ ბავშვი დაიმალა და მისი მეგობარი ძაღლის სახლში ჩაეძინა. მარიამი იზრდება სიყვარულით სავსე ოჯახში, სიმართლეს არ შეესაბამება ინფორმაცია, თითქოს ძვირადღირებული მობილური დაკარგა და ამის გამო მას ეჩხუბნენ, (მობილური ნამდვილად დარჩა ეზოში, რომლის ღირებულებაც 40 ლარს არ აღემატება). მსგავსი თემა არასდროს ყოფილა ოჯახში კონფლიქტის საბაბი. ამ დრომდე ჩვენთვისაც უცნობია, რა გახდა მისი ამ გადაწყვეტილების მიზეზი. 

მარიამს ძალიან უყვარს ცხოველები, გუშინწინ მოუკვდა ბარტყი, რომელსაც ძალიან უვლიდა და ეს მისთვის საკმაოდ სტრესული ემოცია იყო.

გუშინდელმა დღემ გვაჩვენა, რომ უამრავი მხარდამჭერი ჰყავს ჩვენს ოჯახს, ვმუშაობთ გამოცდილ სპეციალისტებთან და ახლობლებთან ერთად, დარწმუნებულები ვართ, მარიამთან ერთად ვიპოვით მიზეზებს და საუკეთესო გამოსავალს. 

მადლიერი ვარ და მიყვარხართ ყველა, ვინც ჩვენთან ერთად იდექით, დიდი თუ პატარა, მაშველი თუ პოლიციელი, ჩინოსანი თუ უბრალოდ გულანთებული ადამიანი! კინოლოგების ძაღლი, რომელმაც კვალზე გაგვიყვანა! 

ამ ჯადოსნურ ღამეს უბანში არ დარჩენილა არცერთი ბუჩქი, ხის ძირი და კუთხე-კუნჭული, რომელსაც ციცინათელები არ ანათებდნენ.

მადლობა ამ ერთობისთვის!

მადლობა დიდ დიღომს და მთელ თბილისს გვერდში დგომისთვის!", - ნათქვამია გავრცელებულ განცხადებაში.

შეგახსენებთ, რომ 11 წლის მარიამ ბარაბაძე 16 ივნის დღის მეორე ნახევარში გაუჩინარდა. ბავშვი 17 ივნისის გვიან ღამით ქუჩაში, ძაღლის სახლში მძინერე იპოვეს.