ტყუილია, რომ კურიერი TikTok-ზე კალაძის გინების გამო დააჯარიმეს - მერიის განცხადება

თბილისის მერია განცხადებას ავრცელებს, რომლითაც მედიასაშუალებებში გავრცელებულ ინფორმაციას ეხმაურება.

როგორც უწყება განმარტავს, ინფორმაცია, რომ თითქოს, ერთ-ერთი კომპანიის კურიერი სასამართლომ 2 000 ლარით იმიტომ დააჯარიმა, რომ თბილისის მერს სოციალურ ქსელში სიტყვიერი შეურაცხყოფა მიაყენა, ტყუილია.

"გვინდა, გამოვეხმაუროთ რიგი მედიასაშუალებების მიერ გავრცელებულ ინფორმაციას, რომლის მიხედვით, თითქოს, ერთ-ერთი კომპანიის კურიერი სასამართლომ 2 000 ლარით იმიტომ დააჯარიმა, რომ თბილისის მერს სოციალურ ქსელში სიტყვიერი შეურაცხყოფა მიაყენა. ეს ინფორმაცია არის სრული ტყუილი და ემსახურება საზოგადოების დეზინფორმირებას.

სტატია სათაურით - „კურიერმა კალაძეს ტიკტოკზე აგინა. სასამართლომ ის ორი ათასი ლარით დააჯარიმა“, ასევე გავრცელდა სოციალური ქსელებით, რამაც მომხმარებელთა აღშფოთება გამოიწვია. თბილისის მერიის პრესსამსახურის მიმართვის საფუძველზე, მოგვიანებით სტატიის სათაური უმნიშვნელოდ დაკორექტირდა.

როგორც გაირკვა, ამბავი, რომლის შესახებაც მედიამ გუშინ აცნობა საზოგადოებას, გასული წლის 6 დეკემბერს მოხდა. აღნიშნული პიროვნების მიმართ განხორციელდა ადმინისტრაციული სამართალწარმოება 166-ე, 173-ე მუხლების მიხედვით, რაც გულისხმობს საჯარო სივრცეში ლანძღვა-გინებას და სამართალდამცავი ორგანოს თანამშრომლებისადმი დაუმორჩილებლობას. ჯარიმა სასამართლოს მიერ განისაზღვრა შესაბამისად.

აქედან გამომდინარე, ხაზგასმა, თითქოს ახალგაზრდა დაჯარიმდა მხოლოდ და მხოლოდ თბილისის მერის მისამართით გამოთქმული უცენზურო სიტყვების გამო, არის სრული ტყუილი, კონკრეტული მედიის მიერ აგორებული მორიგი პროვოკაცია და  კახა კალაძის რეპუტაციის შელახვის მცდელობა.

გვინდა, მოვუწოდოთ მედიის წარმომადგენლებს, პატივი სცენ საკუთარ პროფესიას და საზოგადოებას, რომელიც მათგან ელოდება არა ყალბ და დამახინჯებულ ინფორმაციას, არამედ რეალურ ფაქტებს.

აქვე შევახსენებთ ყველას, ცილისწამება დანაშაულია, რომელიც ისჯება კანონის შესაბამისად", - აღნიშნულია მერიის მიერ გავრცელებულ განცხადებაში.

შეგახსენებთ, "საქართველოს ახალგაზრდა იურისტთა ასოციაციიმ" გაავრცელა ინფრომაცია, რომ ერთ-ერთი კომპანიის კურერი სასამართლომ TikTok-ზე გამოქვეყნებული ვიდეოსთვის დააჯარიმა.

კურიერი ვიდეოში აკრიტიკებდა თბილისის სატრანსპორტო პოლიტიკას და ლანძღავდა პოლიციელებს, რომლებიც შერჩევითად აჯარიმებენ "ბასლაინში" მოქალაქეებს, სახელმწიფო უწყებების თანამშრომლებს და მათთან დაახლოებულ პირებს კი პასუხს არ სთხოვენ.