ბიძინა ივანიშვილმა მისი კადრი განაწესა ეროვნულ ბანკში - რას ამბობს ლევან ხაბეიშვილი ნათია თურნავას არჩევაზე?
უჩა მამაცაშვილის კადრი დანიშნეს ეროვნულ ბანკში მაღალ თანამდებობაზე, საიდანაც ბიძინა ივანიშვილი ხალხის ძარცვის ხარჯზე დამატებით მილიონებს იშოვის - განაცხადა „ერთიანი ნაციონალური მოძრაობის“ თავმჯდომარემ, ლევან ხაბეიშვილმა ეროვნული ბანკის პირველ ვიცე-პრეზიდენტად, ნათია თურნავა არჩევასთან დაკავშირებით.
„ეკონომიკის მინისტრი რომ იყო, მაშინ შეჭამა საქართველოს ბიუჯეტი, გახრა პირდაპირი მნიშვნელობით ის, რაც ქართველი ხალხის იყო და ამასობაში ჩვენ ვხედავთ, რომ ბიძინა ივანიშვილმა და პირადად უჩა მამაცაშვილმა მისი კადრი განაწესა ეროვნულ ბანკში მაღალ თანამდებობაზე, ეს იმას ნიშნავს, რომ დამატებით როგორც მოუნდებათ, მათ შორის საბანკო ოლიგარქიის მართვა, დამატებით როგორც მოისურვებენ დოლარის კურსის ცვლილებით მილიონების შოვნას ძარცვის ხარჯზე, ძალიან მარტივად შეისრულებს უჩა მამაცაშვილი და ბიძინა ივანიშვილი.
შესაბამისად, თამამად შეგვიძლია ვთქვათ, რომ დღეს უჩა მამაცაშვილის კადრი დანიშნეს ეროვნულ ბანკში მაღალ თანამდებობაზე და ჩააბარეს ის სისტემა, რომელი სისტემიდანაც გატარებული პოლიტიკის გამო ბიძინა ივანიშვილი ქართველი ხალხის ძარცვის ხარჯზე დამატებით მილიონებს იშოვის.
უნდა დავშალოთ ეს ოლიგარქია, უნდა გავიმარჯვოთ რუსულ კრიმინალურ ხელისუფლებაზე და მხოლოდ ამის შემდეგ ასეთ ნეპოტისტურ, კრიმინალურ გადაწყვეტილებებს მოეღება ბოლო. - თქვა ხაბეიშვილმა.
შეგახსენებთ, დღეს ეროვნული ბანკის საბჭოს სხდომა ჩატარდა, სადაც ხმათა უმრავლესობით საბჭომ მხარი დაუჭირა პირველ ვიცე-პრეზიდენტად, ნათია თურნავას არჩევას.
