საქართველოს ნაკრების თამაშებს ვუყურე, ისინი დიდი ემოციითა და სულისკვეთებით თამაშობენ, ჩემი პატივისცემა მათ - ისრაელის ახალგაზრდული ნაკრების მწვრთნელი

ისრაელის ახალგაზრდული ნაკრების მწვრთნელმა, გაი ლუზონმა კომენტარი გააკეთა ევრო 2023-ის მეოთხედფინალურ დაპირისპირებაზე, სადაც მისი გუნდი ტურნირის მასპინძელ საქართველოს ნაკრებს შეხვდება.

"სიტყვები არ მყოფნის, ისეთი ბედნიერი ვარ. ძალიან მიხარია, რომ დამსახურებულად გავიმარჯვეთ. ყველა კომპლიმენტი და დამსახურება ეკუთვნით ფეხბურთელებს. ამ თაობას განსაკუთრებულს თავმდაბლობა და ენთუზიაზმი ხდის. ისინი ახალგაზრდები არიან, მაგრამ გონებრივად ძალიან მოწიფულები.

შეხვედრამდე ვუთხარი, რომ ოლიმპიადაზე ნამდვილი ჩემპიონები მიდიან – მოზრდილები, მომთმენები. გვსურს, კიდევ ერთი ნაბიჯი გადავდგათ, რათა ოლიმპიადაზე გამორჩეულ ნაკრებებს შორის მოვხვდეთ. ვინმეს რომ ეთქვა, ინგლისის, ჩეხეთისა და გერმანიის ჯგუფიდან ისრაელი გავიდოდა, გიჟად ჩათვლიდნენ. რეალისტები რომ ვიყოთ, უკვე სახლში დასაბრუნებლად უნდა ვემზადებოდეთ.

საქართველოს ნაკრების თამაშებს ვუყურე. ისინი დიდი ემოციითა და სულისკვეთებით თამაშობენ. არავის სჯეროდა, რომ ჯგუფში, სადაც ნიდერლანდები, ბელგია და პორტუგალია თამაშობდნენ, პირველ ადგილს ეს გუნდი დაიკავებდა. ამიტომ, ჩემი დიდი პატივისცემა მათ.

თუ მატჩს 50-60 ათასი მაყურებელი დაესწრება, ამით მხოლოდ ბედნიერი ვიქნები, რადგან ასეთი ატმოსფერო მომწონს. 100 ათასი გულშემატკივრის წინაშე თამაშსაც ვისურვებდი. ჩვენ მოსაგებად ყველაფერს გავაკეთებთ და დარწმუნებული ვარ, ნახევარფინალში უკეთესი გუნდი გავა“, – განაცხადა გაი ლუზონმა.

შეგახსენებთ, საქართველოსა და ისრაელის ნაკრებების დაპირისპირება 1 ივლისს, „დინამო არენაზე“ 20:00 საათზე დაიწყება. ცნობილი გახდა, რომ მეოთხედფინალში საქართველოს ნაკრების თამაშზე დასასწრები ყველა ბილეთი ერთ დღეში გაიყიდა.