საქართველოს ძიუდოისტთა ნაკრები ევროპული თამაშების გამარჯვებულია

საქართველოს ძიუდოისტთა ნაკრებმა ევროპულ თამაშებზე ოქროს მედალი მოიპოვა, რაც იმას ნიშნავს, რომ გუნდური ევროპის ჩემპიონატიც მოიგეს.

ფინალში საქართველოს ნაკრებმა გერმანიას იოლად, 4:1 აჯობა. თავიანთი ბრძოლები მოიგეს გურამ თუშიშვილმა, ეთერ ლიპარტელიანმა, ლაშა შავდათუაშვილმა და ლაშა ბექაურმა, მხოლოდ ეთერ ასკილაშვილი დამარცხდა, მაგრამ ამას საბოლოო შედეგზე გავლენა არ მოუხდენია.

ფინალამდე შერეულმა ნაკრებმა თავიდან მერვედფინალში ხორვატიის ნაკრები 4:1 დაამარცხა. თავიანთი შეხვედრები მოიგეს ეთერ ლიპარტელიანმა, სოფიო სომხიშვილმა, ლაშა ბექაურმა და გურამ თუშიშვილმა, ხოლო ერთადერთი მარცხი ეთერ ასკილაშვილმა განიცადა.

მეოთხედფინალში საქართველომ თურქეთის ნაკრებიც იოლად დაამარცხა, ისევ - 4:1. ლიპარტელიანმა, ლაშა შავდათუაშვილმა, ბექაურმა და თუშიშვილმა იმარჯვეს, ხოლო სომხიშვილმა თურქ მეტოქესთან წააგო.

ნახევარფინალში საქართველოს გაცილებით რთული ბრძოლა გადახდა იტალიის ნაკრების წინააღმდეგ, მაგრამ გამარჯვება მაინც მოახერხა - 4:3. სომხიშვილმა, შავდათუაშვილმა, ბექაურმა და თუშიშვილმა მოიგეს თავიანთი ბრძოლები, ასკილაშვილი, ლიპარტელიანი და თუშიშვილი დამარცხდნენ. გურამმა გადამწყვეტი, დამატებითი მე-7 ბრძოლა მოიგო და საქართველოს ნაკრები ფინალში გაიყვანა. ამრიგად, ძიუდოისტთა ნაკრებმა საქართველოს ევროპულ თამაშებზე მესამე ოქროს მედალი მოუტანა.

საქართველოს ნაკრების აქტივში ევროპულ თამაშებზე 3 ოქროს, 1 ვერცხლის და 2 ბრინჯაოს მედალია.