დედამიწაზე ყველაზე ცხელი დღე როდის იყო? - მეცნიერების ახალი დასკვნა ცნობილია

3 ივლისი მსოფლიოში ყველაზე ცხელი დღე იყო აღრიცხულთა შორის;  ამერიკელ მეტეოროლოგთა მიერ ჩატარებული გაზომვების თანახმად, პლანეტის საშუალო ტემპერატურამ ამ დღეს 17 გრადუს ცელსიუსს გადააჭარბა.

აშშ-ის ოკეანისა და ატმოსფეროს ეროვნული ადმინისტრაციის (NOAA) მონაცემებით, პლანეტის საშუალო დღიური ტემპერატურა 3 ივლისს 17,01 °C იყო.

წლის ნებისმიერ მოცემულ დღეს, მსოფლიოს საშუალო ტემპერატურა 12 °C – 17 °C-ს შორის მერყეობს. 1979-2000 წლებს შორის, ივლისის დასაწყისის საშუალო ტემპერატურა 16,2 °C-ია.

ახალი ჩანაწერი ჯერ კიდევ არ არის დადასტურებული სხვა მონაცემებით, მაგრამ ეს რეკორდი შეიძლება მალე მოიხსნას კიდეც, რადგან ჩრდილოეთ ნახევარსფეროში ზაფხული დაიწყო.

როგორც წესი, გლობალური საშუალო ტემპერატურა ივლისის ბოლომდე ან აგვისტოს დასაწყისამდე აგრძელებს მატებას.

ევროკავშირის კლიმატის მონიტორინგის თანამგზავრ „კოპერნიკის“ მონაცემებით, გლობალური საშუალო ტემპერატურა ივნისის დასაწყისისთვისაც კი ყველაზე მაღალი იყო აღრიცხულთა შორის.

მსოფლიო მეტეოროლოგიური ორგანიზაციის პროგნოზით, გლობალური საშუალო ტემპერატურა მომავალ წელს კიდევ უფრო მოიმატებს, რისი ერთ-ერთი მიზეზიც წყნარი ოკეანის ფენომენი, ელ-ნინიო და მისი გავლენა იქნება.

ამას გარდა, ადამიანის საქმიანობის შედეგად, ძირითადად წიაღისეული საწვავის წვით, ყოველწლიურად ატმოსფეროში გაიფრქვევა 40 მილიარდი ტონა ნახშირორჟანგი (CO2), რომელსაც პლანეტისთვის სათბურის ეფექტი აქვს.