ბედნიერი ვართ, რომ ჩვენს სამშობლოში იქადაგა ხუთმა მოციქულმა, ვხარობთ, რომ მათ მიერ დაწყებული დიდი საქმე დღესაც გრძელდება - მეუფე შიო

ჩვენმა დიდმა წინაპრებმა იცოდნენ, რომ კვართის ფლობა ჩვენი ერისთვის არის უდიდესი ლოცვა-კურთხევა ღვთისგან, როგორც ჩვენდამი ღვთისგან ბოძებული დიდი სამოღვაწეო დანიშნულება, რაც გულისხმობს განსაკუთრებულ ზრუნვას ეკლესიის ერთიანობაზე, ეკლესიის სწავლების სიწმინდეზე, – ამის შესახებ საქართველოს მართლმადიდებელი ეკლესიის საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა, შიო მუჯირმა მცხეთაში, სვეტიცხოვლობის დღესასწაულისადმი მიძღვნილი საზეიმო მსახურების დასრულების შემდეგ, ქადაგებისას განაცხადა.

„დღეს არის თორმეტი მოციქულის ხსენება და აი, ამ დიდებული და ბრწყინვალე ტაძრის დღესასწაული. გადმოგცემთ სრულიად საქართველოს კათოლიკოს-პატრიარქის, ილია მეორის ლოცვა-კურთხევას. შეგვეწიოს ჩვენ და მთელ საქართველოს მისი დალოცვა.

წმინდა ეკლესია დღეს განსაკუთრებულად ზეიმობს მოციქულთა ხსენებას. თქვენ იცით, რომ გუშინ იყო წმინდათა თავთა მოციქულთა პეტრეს და პავლეს ხსენება. დღეს, როგორც გითხარით, არის თორმეტი მოციქულის ხსენება, ვინაიდან ისინი თვით უფალმა იესო ქრისტემ გამოირჩია. იგი ეტყვის მათ ერთხელ: „განა თორმეტი არ გამოგარჩიეთო?“ – გახსოვთ ეს მისი სიტყვები.

განსაკუთრებით ვზეიმობთ მოციქულთა ხსენებას ასევე იმიტომ, რომ წმინდა ეკლესიის ერთ-ერთი მთავარი დამახასიათებელი ნიშანი გახლავთ სწორედ ის, რომ სამოციქულოა ეკლესია, როგორც ჩამოაყალიბეს ჩვენმა წმინდა მამებმა სარწმუნოების სიმბოლოში: „მრწამს ერთი წმინდა, კათოლიკე და სამოციქულო ეკლესია““, – განაცხადა მეუფე შიო მუჯირმა.

მისივე თქმით, სამოციქულოობა არის ერთ-ერთი მთავარი ნიშანი ჩვენი მართლმადიდებელი ეკლესიისა.

„წმინდა მოციქულები იღვწოდნენ სახარების ქადაგებისთვის, ისინი ქადაგებდნენ იესო ქრისტეს სიტყვას, მის მკვდრეთით აღდგომას, აფუძნებდნენ ეკლესიებს, განამტკიცებდნენ სარწმუნოებას ადამიანებში და ბოლოს, როგორც იცით, ყოველმა მათგანმა მოწამებრივი სიკვდილი მიიღო.

და აი, მათი სიტყვები და მათი ქადაგება ქვეყნიერების კიდემდე მისწვდა, განივრცო, როგორც დღეს მოვისმინეთ ჩვენ დღესასწაულის წარდგომაში წმინდა მეფსალმუნე დავით წინასწარმეტყველის სიტყვები, რომელიც მან წინაგანჭვრიტა მოციქულთა მოღვაწეობის შესახებ: „ყოველსა ქვეყანასა განხდა ხმა მათი და კიდეთა სოფლისათა სიტყვანი მათნი“.

და აი, ჩვენ, ქართველები, ჩვენი ერი, ბედნიერი ვართ, რომ ჩვენს სამშობლოში იქადაგა ხუთმა მოციქულმა, რომელთაგან ორი დაკრძალულია ჩვენს სამშობლოში და ვხარობთ იმით, რომ მოციქულთა მიერ დაწყებული დიდი საქმე ქადაგებისა და ეკლესიის დაარსებისა დღესაც გრძელდება. ამის დასტური არის, რომ ჩვენ აქ ერთად ვიმყოფებით, მიუხედავად ამდენი ქარტეხილისა და სირთულისა, რაც ჩვენს ერს გადახდა ისტორიაში“, – აღნიშნა მეუფე შიო მუჯირმა.

მისი თქმით, სვეტიცხოვლის წმინდა ტაძარში ლოცულობდნენ კათოლიკოს-პატრიარქები, საქართველოს მეფეები, იკურთხებოდნენ პატრიარქები, ეპისკოპოსები და დღესაც იკურთხებიან.

„ჩვენ ვაგრძელებთ სახარების ქადაგებას, ღვთის სიტყვის ქადაგებას დღესაც. ამ დიდ საქმეში ჩვენ გვეწევიან წმინდა მოციქულები, ვინაიდან ვცდილობთ, შეძლებისდაგვარად მივბაძოთ მათ.

როგორც მოგეხსენებათ, ამ დიდებულ ტაძარში არის დაფლული და დავანებული კვართი უფლისა ჩვენისა იესო ქრისტესი, ეს ერთ-ერთი უდიდესი სიწმინდე ქრისტიანული სამყაროსი. თქვენ ალბათ გახსოვთ, რომ, წმინდა მამების სწავლებით, კვართი იყო მატარებელი მამაზეციერიდან მომდინარე ერთობისა, ერთიანობისა, ამ ერთობის დარღვევა არ შეეძლო იმას, ვინც იქნებოდა კვართის მფლობელი. ასე წერენ პირდაპირ წმინდა მამები, რომ ქრისტეს შესამოსლის ფლობა არ ძალუძს იმას, ვინც განყოფს და არღვევს ქრისტეს ეკლესიას.

აი, ამდენად, კვართი – ეს არის სიმბოლო ეკლესიის ერთიანობისა და, აქედან გამომდინარე, კვართი არის სიმბოლო  ეკლესიის თავის, თვით უფალი იესო ქრისტეს სიმბოლოც და ჩვენმა დიდმა წინაპრებმა ეს მშვენივრად უწყოდნენ. მათ ეს იცოდნენ, რომ კვართის ფლობა ჩვენი ერისთვის არის უდიდესი ლოცვა-კურთხევა ღვთისგან, როგორც ჩვენდამი ღვთისგან ბოძებული დიდი სამოღვაწეო დანიშნულება, რაც გულისხმობს განსაკუთრებულ ზრუნვას ეკლესიის ერთიანობაზე, ეკლესიის სწავლების სიწმინდეზე. სწორედ ამიტომ ჩვენმა წინაპრებმა ჩვენამდე უმწიკვლოდ შეინახეს ეკლესიის სიწმინდეც და კვართიც უფლისა ჩვენისა იესო ქრისტესი“, – განაცხადა მეუფე შიო მუჯირმა.