ვესაუბრებით "სტრატეგია აღმაშენებელს", საქმეს განახებთ უახლოეს დღეებში - ლევან ხაბეიშვილი
"ერთიანი ნაციონალური მოძრაობის" თავმჯდომარე ლევან ხაბეიშვილი აცხადებს, რომ სხვადასხვა პროდასავლურ პარტიებთან ერთად "გამარჯვების პლატფორმის" შექმნა სურს.
მისი თქმით, ბიძინა ივანიშვილისა და "რუსული პარტიის" წინააღმდეგ მთავარი "გამარჯვების ცენტრი" მათი პარტიის ბაზაზე გაკეთდება, თუმცა სხვა პარტიების ერთობასაც მიესალმებიან. ხაბეიშვილი ადასტურებს კონსულტაციებს "სტრატეგია აღმაშენებელთან"
"ცხადია, ვესაუბრებით "სტრატეგია აღმაშენებელს " და ეს გულისხმობს იმას, რომ სხვადასხვა პროდასავლური პარტიებსა და ლიდერებთან ერთად გამარჯვების პლატფორმა შევქმნათ. მივესალმებით ყველას, ვინც ამ გამარჯვების პლატფორმაში საკუთარ თავს დაინახავს და ასევე, მივესალმებით იმ ფაქტს თუ ცალკე პროდასავლური პარტიებიც გააკეთებენ ერთობას. ჩვენ საქმეს განახებთ უახლეოს დღეებში.
გამიხარდებოდა სხვა ოპოზიციურმა პარტიებმაც რომ მიიღონ კონკრეტული გადაწყვეტილებები და ან "ნაციონალურ მოძრაობასთან" ერთად გააკეთონ გამარჯვების პლატფორმა და ჩვენ ღია ვართ, ან თავად გააკეთონ, აჩვენონ საზოგადოებას თანამშრომლობის მაგალითი. მივესალმებით პროდასავლური პარტიების ერთობას, იმიტომ, რომ "ნაციონალურ მოძრაობის" ბაზაზე გაკეთდება მთავარი გამარჯვების ცენტრი ბიძინა ივანიშვილის და რუსული პარტიის წინააღმდეგ," - ამბობს ხაბეიშვილი.
