ყოფილი ნაციონალი არ არსებობს - მიხეილ სარჯველაძე
ვფიქრობ, რომ ნაბიჯი, რომელიც გადადგეს "სტრატეგია აღმაშენებელმა" და "ნაციონალურმა მოძრაობამ", არის იძულებითი ნაბიჯები და სინამდვილეში არანაირი სიხარული არ ჰქონიათ ამ პოლიტიკურ გუნდებს, სულ მცირე მარტო იმიტომ, რომ იმ მძიმე კითხვებზე პასუხის გაცემა უწევთ მაგალითად, მანამდე რა განცხადებებიც აქვთ გაკეთებული "ნაციონალურ მოძრაობაზე" "სტრატეგია აღმაშენებლის" ლიდერებს და პირიქით, - ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ „ნაციონალური მოძრაობის“ და „სტრატეგია აღმაშენებლის“ მიერ ერთიანი პლატფორმის შექმნის გადაწყვეტილებაზე საუბრისას განაცხადა.
"ეს იძულებითია იმიტომ, რომ მაგალითად "სტრატეგია აღმაშენებლისთვის" რასაკვირველია, კრიტიკულად მწვავედ დგას ბარიერის გადალახვასთან დაკავშირებული საკითხი და მას მოუწევს ისეთი გადაწყვეტილებების მიღება, რომელიც მისი გადმოსახედიდან დააზღვევს მომდევნო არჩევნებში ბარიერის გადალახვის შესაძლებლობას. მეორეს მხრივ, "ნაციონალურ მოძრაობას" აქვს პრობლემა, სადაც იმდენად კრიტიკულად მცირეა მისი მხარდაჭერა და რადიკალურად შემცირებული, რომ თითო პროცენტსაც კი უფრთხილდებიან და შესაბამისად, მაქსიმალურად ცდილობენ რესურსების თავმოყრას. ყველაფრიდან გამომდინარე, ეს არ არის იდეური გაერთიანება. მიუხედავად იმისა, რომ იდეური სიახლოვე ამ ხალხს შორის ყოველთვის არსებობდა, რადგან შეგვიძლია ცნობილი გამონათქვამის პერიფრაზი გავაკეთოთ - როგორც ჩანს, ყოფილი ნაციონალი არ არსებობს და ეს არის მიზეზი.
მათი სურვილის მიუხედავად, ყოფილიყვნენ დამოუკიდებლად, მაგალითად, ვაშაძეს ჰქონდა ეს სურვილი და ღიად საუბრობდა, რომ მას არ უნდოდა იმ ტვირთის ტარება, რაც ნაციონალური მოძრაობის მძიმე რეპუტაციას უკავშირდება, ახლა მას უწევს ამ კომფორტზე უარის თქმა და იმ წიაღში დაბრუნება, რომლიდანაც ის წარმოიშვა. წარუმატებლობის გზაზე მდგარი ეს ორი პარტია ომახიან განცხადებებს აკეთებს იმასთან დაკავშირებით, რომ ეს არის თითქოს წარმატების ფორმულა, წარმატების პლატფორმა, მაგრამ სინამდვილეში, ყველა კარგად ხვდება, რომ მათ მოსაფიქრებელი აქვთ ალტერნატიული გზები, რომ დაღმართში მავალი ეს პოლიტიკური დაჯგუფებები რაღაცნაირად გადაარჩინონ", - განაცხადა მიხეილ სარჯველაძემ.
