მომავლის საკვები - ლოს ანჯელესის ციფრული საცხობი ტკბილეულს ბეჭდავს

ლოს-ანჯელესში მდებარე „ციფრული საცხობი“ 3D საკვები პრინტერის გამოყენებით ტკბილეულის კერძებს ქმნის. ეს პირველი საკვები პრინტერია, რომელიც დახვეწილი დიზაინის შესაქმნელად შაქარს იყენებს.

"Sugar Lab"-ის თანადამფუძნებლის კაილ ფონ ჰასელნის მოგზაურობა კულინარიული შაქრის შემოქმედებით სამყაროში მას შემდეგ დაიწყო, როდესაც ის სამხრეთ კალიფორნიის არქიტექტურის ინსტიტუტის სტუდენტი იყო. მან ტრადიციული 3D პრინტერი იყიდა და ინგრედიენტებით ექსპერიმენტები დაიწყო.

მისი თქმით, შედეგად მიიღო 3D საკვები პრინტერი, რომელიც ერთადერთი სერტიფიცირებული პრინტერია სურსათის უვნებლობის ორგანოს NSF-ის მიერ. სხვა 3D ტკბილეულის პრინტერებისგან განსხვავებით, ფონ ჰასელნი ამბობს, რომ მის მანქანას შეუძლია პასტის ნაცვლად წვრილმარცვლოვანი შაქრის გამოყენება, რაც ტკბილეულის საბოლოო პროდუქტზე მეტი დეტალის შექმნისა და კონტროლის საშუალებას იძლევა.

Sugar Lab-ში აღნიშნული პრინტერით ბეჭდავენ მულტფილმის გმირებსა და სუპერგმირებს, ჯადოქრებს, ნამცხვრებს, სასმელის დანამატებს და შაქრის ნუგბარს. არომატისთვის ხშირად დეჰიდრატებულ ხილს იყენებენ. მეორე მხრივ, გუნდი ასევე კიმჩის ბულიონისთვის სუპის წვეთებს აწარმოებს.

ბეჭდვის პირველი ეტაპი ციფრული ფაილის შექმნაა. ფაილი Sugar Lab-ის დიზაინერის და მთავარი შეფ-მზარეულის მიერ 3D მოდელად გარდაიქმნება. შემდეგ გადადის პრინტერში, საიდანაც ბეჭდვა იწყება.

„ვგრძნობ, რომ მომავალის საკვებზე ვმუშაობ. ერთ დღეს, ეს ყველაფერი ყველას სამზარეულოში იქნება” - ამბობს Sugar Lab-ის შეფ-მზარეული ჯონათან სოლომონი.

მანამდე კი, ტკბილი კერძების შეკვეთა ან შეძენა Sugar Lab-ის ვებსაიტზეა შესაძლებელი. ფასები შოკოლადითა და ჯანჯაფილის შიგთავსით დაბეჭდილი მარწყვისთვის 25 დოლარიდან იწყება.

წყარო: business-partner.ge