სიცხის გამო, განგაშის წითელი დონე - საქართველოს საფრთხე ემუქრება?

ექსტრემალური სიცხე - პლანეტა ტემპერატურის მკვეთრ მატებას ებრძვის. რამდენიმე ქვეყანამ განგაშის წითელი დონე გამოაცხადა, ადამიანებს გარეთ გასვლისგან თავის შეკავებას ურჩევენ. მაღალ ტემპერატურას თან ხანძრებიც ერთვის, რაც მდგომარეობას კატასტროფულად ართულებს.

სიცხის ტალღებმა ტყის ხანძრები იტალიაში, ესპანეთში, საფრანგეთში, სერბეთში, ხორვატიასა და საბერძნეთში გამოიწვია. მდგომარეობა რთულია ამერიკის შეერთებულ შტატებსა და ჩინეთშიც. მეტეოროლოგები ჰაერის რეკორდულად მაღალ ტემპერატურაზე საუბრობენ, ზოგ შემთხვევაში, საუბარია, 50 გრადუს ცელსიუსზე.

დაიძრა თუ არა სიცხის ციკლონი საქართველოსკენ? ჰაერის ტემპერატურა ჩვენს ქვეყანაშიც მაღალია და დღის საათებში საკმაოდ ცხელა. თუმცა, თამამად შეიძლება ითქვას, რომ ამ ეტაპზე საქართველოში მსგავსი გვალვა მოსალოდნელი არ არის. სინოპტიკოსების პროგნოზით, 26-27 ივლისს დასავლეთ საქართველოში უნალექო ამინდია მოსალოდნელი, ჰაერის ტემპერატურამ კი 27 ივლისს შესაძლოა +37, +39 გრადუსს მიაღწიოს. 28 ივლისს ისევ გაწვიმდება და აგრილდება.

აღმოსავლეთ საქართველოში 29 ივლისამდე ზოგან იწვიმებს. ჰაერის ტემპერატურა +30, + 35 გრადუსი იქნება.