Apple-ის უიშვიათესი ბოტასები, აუქციონზე $50 000-ად იყიდება
Apple-ის უიშვიათესი ბოტასები აუქციონზე $50 000-ად გავა. BBC-ის ინფორმაციით, კომპანიამ 1990-იან წლებში ფეხსაცმელი თანამშრომლებისთვის შეუკვეთა, როგორც ერთჯერადი საჩუქარი რიგითი კონფერენციის დასასრულს.
ბოტასები აქამდე არასდროს გამოსულა გასაყიდად. ახლახან კი მსოფლიოს ყველაზე მსხვილმა სააუქციონო სახლმა, სოტბიმ, გამოაცხადა, რომ Apple-ის ერთ-ერთი ყოფილი თანამშრომელი მზადაა, ბოტასები აუქციონზე გაიტანოს.
მასში ძირითადად თეთრი ტყავია გამოყენებული და დატანილია ეფლის ლოგო ცისარტყელას ფერებში. აღწერაში ვკითხულობთ, რომ ბოტასების ევროპული ზომა 41-ია. მას ალტერნატიული, ყვითელი ფერის ზონარიც მოჰყვება. Apple 1986-1987 წლებში ტანსაცმლის ხაზის გამოშვებას გეგმავდა, რაც მიზნად ისახავდა საზოგადოებაში ბრენდის პოპულარიზაციას. მოგვიანებით კომპანიამ გადაწყვიტა, რომ ინიციატივა დიდ წარმატებას ვერ მოიტანდა, ამიტომ ხაზის წარმოება არ დაუწყია.
