სტიქიის ეპიცენტრში უკვე 60% მიწის მასის გადამოწმებულია - თემურ მღებრიშვილი
მეწყერი რაჭაში - საგანგებო სიტუაციების მართვის სამსახურის ხელმძღვანელის, თემურ მღებრიშვილის ინფორმაციით, სტიქიის ეპიცენტრში მიწის მასის 60% გადამოწმებულია. მღებრიშვილის თქმით, ღამის განმავლობაში მაშველებს სამძებრო სამუშაოების დროს ცხედარი არ უპოვიათ, თუმცა, ნაპოვნია სხეულის კიდურები.
სტიქიის ეპიცენტრში უკვე 60% მიწის მასის გადამოწმებულია საძიებო სამუშაოების მიზნით. ასევე, მინდა მოგახსენოთ, რომ მდინარის კალაპოტებში 54 კილომეტრის მონაკვეთი, რომელიც არის ამბროლაურის აეროპორტის მიმდებარე ტერიტორია, სადაც 18 ლოკაციაზე მიმდინარეობს წერტილოვანი გადამოწმებები," - განაცხადა მღებრიშვილმა.
3 აგვისტოს, კურორტ შოვში მეწყერი ჩამოწვა. ადიდებულმა მდინარემ წაიღო სამანქანო ხიდი და კოტეჯები, სადაც დამსვენებლები იყვნენ. მოსახლეობის დასახმარებლად ადგილზე ჩაფრინდა სასაზღვრო პოლიციის 2 სამაშველო ვერტმფრენი, ჩართულია მძიმე ტექნიკა და თავდაცვის ძალების 220 სამხედრო მოსამსახურე.
ამ დროისთვის ოფიციალური მონაცემებით, მეწყერს 24 ადამიანის სიცოცხლე ემსხვერპლა - 9 ადამიანი კვლავ იძებნება.