დიახ, პრეზიდენტ სააკაშვილთან ერთად სოხუმში აუცილებლად ავაშენებთ აეროპორტს, ყველაზე დიდ აეროპორტს, ამაში ვარ დარწმუნებული - ლევან ხაბეიშვილი
საქართველოს მოქალაქემ უნდა იცოდეს ერთი რამ, უკრაინა დაამარცხებს პუტინის რუსეთს და საქართველო მშვიდობიანად აღადგენს თავის ტერიტორიულ მთლიანობას, - ასე გამოეხმაურა „ერთიანი ნაციონალური მოძრაობის“ თავმჯდომარე, ლევან ხაბეიშვილი აფხაზი ვეტერანების განცხადებას, რომლებმაც თქვეს, რომ აფხაზეთის დამოუკიდებლობის ალტერნატივა არ არსებობს.
ლევან ხაბეიშვილის განცხადებით, იგი დარწმუნებულია, რომ მომავალში, სოხუმში პრეზიდენტ სააკაშვილთან ერთად ყველაზე დიდ აეროპორტს ააშენებს.
„საქართველოს მოქალაქემ უნდა იცოდეს ერთი რამ - უკრაინა დაამარცხებს პუტინის რუსეთს და საქართველო მშვიდობიანად აღადგენს თავის ტერიტორიულ მთლიანობას. ერთ რამეში ვარ დარწმუნებული, რომ დიახ, პრეზიდენტ სააკაშვილთან ერთად სოხუმში აუცილებლად ავაშენებთ აეროპორტს, ყველაზე დიდ აეროპორტს და ამაში ვარ დარწმუნებული. რაც შეეხება მედვედევს, პუტინს და იმ ხალხს, რომელიც უკვე ევროპული ისტორიის წარსული იქნება უახლოეს მომავალში, დარწმუნებული ვარ, რომ არავითარი პერსპექტივა მათ ამ მიმართულებით არ აქვთ, თუმცა ვწუხვარ, რომ მედვედევის, პუტინის, ლავროვის გაგრძელებები ჯერ კიდევ არიან საქართველოს ხელისუფლებაში და მისი მიმდევრები, რომლებიც ღიად უჭერენ მხარს იმ ადამიანებს, იმ ტერორისტებს, რომელსაც ოკუპირებული აქვთ საქართველოს ტერიტორია და ტერორისტულ საქმიანობას ეწევიან მათ შორის უკრაინაში“, - განაცხადა ლევან ხაბეიშვილმა.
