პირადად ჩემი შვილიც ჩაირიცხა მოსკოვში და ახლა პირველი კურსის სტუდენტი იქნება - რას ამბობს კონსტანტინე მორგოშია?

რუსეთი ქართველ ახალგაზრდებს უნივერსიტეტებში სწავლას უფასოდ სთავაზობს. განაცხადების მიღება უკვე 1 სექტემბრიდან დაიწყება. მოლაპარაკებებში უშუალოდ ჩართულობას "ალტ-ინფოც" ადასტურებს.

კოკა მორგოშია "პირველებთან" საუბარში ამბობს, რომ რუსეთში მიღებული განათლება  წარმატების წინაპირობა იქნება. 

"დიდი კონტინგენტი ჩვენი საამაყო არის, ის ხალხი, ქართველები, რომლებმაც რუსეთში მიიღეს განათლება და მე ამით მხოლოდ და მხოლოდ მოხარული ვარ და არ ვმალავ, პირადად ჩემი შვილიც ჩაირიცხა მოსკოვში და ახლა პირველი კურსის სტუდენტი იქნება. აქ არაფერი კავშირი რბილ ძალასთან და არაფერთან არ არის, სწავლა არის სწავლა. ჩვენ, ვხედავთ ევროპაში სწავლა-განათლება მიღებულ ხალხს აქ რა ანტისახელმწიფოებრივ ნაბიჯებსაც დგამენ. ეს პირიქით შეკვეცავს იმ ტყუილის მანქანას, რასაც მაგალითად თქვენ მიუძღვებით და იმ ზღაპრებს, რომ რუსეთში ვიღაც დათვი ზის არყით და ყველას ესვრის ატომურ ბომბებს და შიმშილით კვდებიან, არაფერი არ იყიდება და შიშველი დარბიან ლეღვისფოთოლ აფარებულები, მაგას ჩამოანგრევს. არაფერი საფრთხე არ არის და ვერც იქნება, კომფორტი ექნებათ შექმნილი ბავშვებს სწავლის პერიოდში და ბევრად უფრო საშუალება იქნება, თუნდაც ბიზნესის კეთების, განვითარების და დიდი კაპიტალის ჩამოტანის საქართველოში. გოსდუმის დეპუტატი იქნებოდა თუ უფრო მაღალი რანგის პოლიტიკოსი, ყველასთან ვსაუბრობდით უვიზო მიმოსვლაზე, პირდაპირ ფრენებზე, ქვეყნის დეოკუპაციაზე, სწავლაზე და სხვადასხვა პროექტებზე", - ამბობს "ალტ-ინფოს" დამფუძნებელი.