მაროკოში მიწისძვრის შედეგად დაღუპულთა რიცხვმა 2 100-ს გადააჭარბა
მაროკოში მომხდარი მიწისძვრის შედეგად სულ მცირე 2 122 ადამიანი დაიღუპა და დაშავდა 2 421-მდე პირი.
როგორც მაშველები ამბობენ, მსხვერპლთა რაოდენობა კვლავ გაიზრდება, რადგან ნანგრევებში მოყოლილთა სამძებრო-სამაშველო ოპერაციები ისევ მიმდინარეობს.
ქვეყანაში სამდღიანი გლოვაა გამოცხადებული.
ცნობისთვის, მაროკოში 6.8 მაგნიტუდის სიმძლავრის მიწისძვრა 8 სექტემბერს, გვიან ღამით, ადგილობრივი დროით 23:11 საათზე, მოხდა.
მიწისძვრამ ყველაზე მეტად მარაკეში დააზიანა, რომელიც იუნესკო-ს მსოფლიო მემკვიდრეობის ძეგლთა სიაშია. ქალაქში მეჩეთი დაზიანდა და რამდენიმე შენობა ჩამოინგრა.
