ჩვენ გვჯერა უკრაინის გამარჯვების, მაგრამ მისი პოლიტიკა მავნე და შეურაცხმყოფელია - პოლონეთის საგარეო საქმეთა მინისტრი
„ჩვენ გვჯერა უკრაინის გამარჯვების, მაგრამ მისი პოლიტიკა მავნე და შეურაცხმყოფელია“, - ამის შესახებ პოლონეთის საგარეო საქმეთა მინისტრმა ზბიგნევ რაუმ განაცხადა.
მისი თქმით, შედარება პოლონეთსა და რუსეთს შორის, რომელიც ბოლო დღეებში გამოჩნდა უკრაინელი პოლიტიკოსების განცხადებებში, უკიდურესად შეურაცხმყოფელია პოლონეთის საზოგადოებისთვის.
„საუკუნეების მანძილზე პოლონეთი და უკრაინა იყო რუსული იმპერიალიზმის მსხვერპლნი, რომლებიც ცდილობდნენ ჩვენს დამორჩილებას 1939 წელს პოლონეთში, 2022 წელს უკრაინაში გაუპატიურების, ძარცვის, დეპორტაციისა და სიკვდილით დასჯის გზით. ჩვენი მთავრობა დაეხმარა უკრაინასა და უკრაინელებს ომის დროს. თითქმის ყველა პოლონური ოჯახი უკრაინის მიმართ თანაგრძნობას გამოხატავს. სწორედ ამიტომ, ჩვენ მიგვაჩნია უკრაინის ამჟამინდელი პოლიტიკა არა მხოლოდ მავნე, მტკივნეული, არამედ, უპირველეს ყოვლისა, შეურაცხმყოფელი“, - აცხადებს საგარეო საქმეთა მინისტრი.
პოლონეთის საგარეო საქმეთა სამინისტროს ხელმძღვანელმა აღნიშნა, რომ პოლონეთს სჯერა უკრაინის გამარჯვების და არ გადგება გვერდით.
„საჭირო იქნება მუშაობა, რათა აღდგეს პოლონეთის საზოგადოების ნდობა უკრაინის ხელისუფლების კეთილგანწყობის მიმართ“, - დასძენს პოლონელი დიპლომატი.
შეგახსენებთ, რომ პოლონეთის პრემიერ-მინისტრმა მატეუშ მორავეცკიმ განაცხადა, რომ ვარშავა ახლა ორიენტირებულია საკუთარი არმიის გადაიარაღებაზე და ამიტომ სამხედრო დახმარებას კიევს არ გადასცემს.
განცხადება ვარშავასა და კიევს შორის არსებული დაძაბულობის ფონზე გაკეთდა უკრაინის სოფლის მეურნეობის პროდუქციაზე პოლონეთის ცალმხრივი შეზღუდვების და უკრაინის საპასუხო ქმედებების გამო.
პოლონეთის პრეზიდენტმა ანჯეი დუდამ, ასევე, განმარტა, რომ მორავეცკის სიტყვები არასწორად იქნა განმარტებული.
