რუსეთმა და ბელარუსმა ერთობლივი სამხედრო წვრთნები დაიწყეს
რუსეთმა და ბელარუსმა დღეს, პარასკევს დაიწყეს ერთობლივი სამხედრო წვრთნები რუსეთის ტერიტორიაზე. წვრთნები 26 სექტემბერამდე გაგრძელდება.
მანევრები ტარდება ორ წელიწადში ერთხელ, მონაცვლეობით ორი ქვეყნის ტერიტორიაზე.
მიმდინარე წვრთნები ბელორუსის თავდაცვის სამინისტრომ თებერვალში გამოაცხადა. მინსკში განაცხადეს, რომ "სამხედრო ალიანსი აუცილებელი პირობაა ორივე სახელმწიფოს შემდგომი განვითარებისთვის".
ბელარუსის თავდაცვის მინისტრის თანაშემწე საერთაშორისო სამხედრო თანამშრომლობის საკითხებში აცხადებს, რომ რუსეთთან მჭიდრო ურთიერთობა სტრატეგიულ დონეზე წელს გაგრძელდება და დაგეგმილია 150-ზე მეტი სხვადასხვა ტიპის ერთობლივი ღონისძიების გამართვა.
