ისრაელს აქვს უფლება, თავი დაიცვას - ურსულა ფონ დერ ლაიენი
ევროკომისიის პრეზიდენტი, ურსულა ფონ დერ ლაიენი, ისრაელზე განხორციელებულ თავდასხმას X-ზე (ყოფილი Twitter) ეხმაურება და გმობს.
ლაიენის შეფასებით,"ჰამასის" მიერ განხორციელებული თავდასხმა არის ტერორიზმი, მისი ყველაზე საშინელი ფორმით და ისრაელს აქვს უფლება, თავი დაიცვას.
"ცალსახად ვგმობ "ჰამასის" მიერ ისრაელის ტერიტორიაზე განხორციელებულ თავდასხმას. ეს არის ტერორიზმი მისი ყველაზე საშინელი ფორმით. ისრაელს აქვს უფლება, დაიცვას თავი ასეთი საშინელი თავდასხმებისგან," - წერს ლაიენი.
ცნობისთვის, დღეს ღაზას სექტორიდან ისრაელზე მოულოდნელი სარაკეტო და სახმელეთო თავდასხმა წამოიწყეს. თავდასხმაზე პასუხისმგებლობა დაჯგუფება "ჰამასმა" აიღო და მას ოპერაცია "ალ-აკსას შტორმი" უწოდა.
ისრაელის შეიარაღებული ძალების ცნობით, ისინი "ჰამასის" წინააღმდეგ საპასუხო დარტყმებს ახორციელებენ - ქვეყანაში სამხედროების მობილიზება დაიწყეს და საომარი მდგომარეობა გამოაცხადეს.
ისრაელის ჯანდაცვის სამინისტროს მონაცემების მიხედვით, "ჰამასის" თავდასხმების შედეგად დაშავებულთა რიცხვი 545-მდე გაიზარდა. სასწრაფო დახმარების სამსახურის მონაცემებით კი, დაიღუპა სულ მცირე 22 ადამიანი.
