თამარ თუმანიშვილი და გრიგორი პეკი - ურთიერთობა, რომელიც პარტნიორობაზე მეტი იყო...

ეს ულამაზესი ქალი საბჭოთა კავშირში პერსონა ნონ გრატად გამოცხადებული ქართველი თავადი იყო. ასე თავად ამბობდა. მისი ცხოვრება ყოველთვის მითების საბურველში იყო გახვეული, წარმომავლობა და სასცენო ფსევდონიმი უამრავ კითხვას აჩენდა...

გოგონას, რომელიც რუსეთიდან ჩინეთისკენ მიმავალი მატარებლის ვაგონში დაიბადა, ევროპისა და ამერიკის საბალეტო სამყარო „შავ მარგალიტს“ უწოდებდა.

სპეციალურად მისთვის იქმნებოდა წარმოდგენები. მას იწვევდნენ ფილმებში და აღმერთებდნენ მსოფლიოში ცნობილი ხელოვანები...

თამარ თუმანიშვილის დედა ევგენია თუმანიშვილი ხელთუბნელ თუმანიშვილთა შთამომავალი გახლდათ.

ოცი წლისაც არ იყო, როცა რუსი სამხედრო ექიმი კონსტანტინე ზახაროვი გაიცნო და ცოლად გაჰყვა. ევგენიას მეუღლე შვილის დაბადებამდე, ეპიდემიას ემსხვერპლა და მარტო დარჩენილი, ფეხმძიმე ქალი, ბოლშევიკების შიშით, იძულებული გახდა, რუსეთიდან გაქცეულიყო.

თამარ თუმანიშვილი 1919 წლის 2 მარტს, ომსკიდან შანხაისკენ მიმავალ მატარებელში მოევლინა ქვეყანას.

ევგენიამ ახალშობილს თავისი გვარი მისცა. ბედად, მშობიარობას ვაგონში მყოფი ექიმი ვლადიმერ ხასიდოვიჩი შეესწრო, რომელმაც მშობიარეზე ზრუნვა საკუთარ თავზე აიღო და მოგვიანებით მასზე დაქორწინდა.

ჩინეთში რამდენიმეწლიანი ცხოვრების შემდეგ, ცოლ-ქმარმა ქვეყანა დატოვა და ეგვიპტის გავლით, რუსული ემიგრაციის ერთ-ერთ ცენტრში - პარიზში გადავიდა.

პარიზში პატარა თამარმა ფორტეპიანოს გაკვეთილებზე დაიწყო სიარული, მაგრამ ერთხელ, ლეგენდარული ანა პავლოვნას ცეკვა ნახა და მტკიცედ გადაწყვიტა, ბალერინა გამოსულიყო.

ოჯახს ემიგრაციაში ძალიან უჭირდა. ევგენია ოჯახს უთოობით არჩენდა, მამა კი, მრავალი რუსი ემიგრანტის მსგავსად, პარიზის ქუჩებში ტაქსაობდა, თუმცა მათ უსახსრობამ ერთადერთი შვილის ოცნებაზე უარი ვერ ათქმევინა.

ევგენია და ვლადიმერი ცეკვის გაკვეთილების გადასახადს დიდი წვალებით აგროვებდნენ, მაგრამ მალე ყველაფერი შეიცვალა...

თამარის მასწავლებელმა და ცნობილმა რუსმა ბალერინამ ოლგა პრეობრაჟენსკაიამ ნიჭიერი გოგონას მშობლებისგან ფულის აღებაზე უარი განაცხადა.

სწორედ აქ, სახელგანთქმული ოლგა პრეობრაჟენსკაიას, იმავე „მადამ პრეოს“, საბალეტო სკოლაში დაიწყო თამარ თუმანიშვილის საბალეტო კარიერა და დიდებისკენ სვლა.

სწორედ პრეობრაჟენსკაიამ შენიშნა პირველად ქართველი გოგონას უზარმაზარი საცეკვაო პოტენციალი.

იხ. სრულად: funtime.ge