"გახარიას ყველგან ვალები აქვს, გადამგდებია... თანაპარტიელებს ავტომობილები და ბინები გააყიდინა, სამმაგად დაგიბრუნებთო, უთხრა და გადააგდო" - ირაკლი კობახიძე
"ქართული ოცნების" თავმჯდომარის, ირაკლი კობახიძის განცხადებით გიორგი გახარიამ თანაპარტიელები "გადააგდო". მისი თქმით, წინასაარჩევნოდ პარტია "საქართველოსთვის" ლიდერმა საკუთარი პარტიის წევრებს ბინები და ავტომობილები გააყიდვინა იმ პირობით, რომ არჩევნების შემდეგ სამმაგად დაუბრუნებდა.
"ამ ადამიანმა გაამწარა და გადაიმტერა უამრავი ადამიანი, თავისივე პარტიაში. ერთ-ერთი, რომელიც მისი პარტიიდან წამოვიდა, შეგვხვდა და ასეთი რაღაც მოგვიყვა - ფაქტობრივად ოფისი არ არსებობს ქვეყნის მასშტაბით, სადაც მან ვალი არ დატოვა, ფულადი ვალი. ყველგან აქვს ვალები, გადამგდებია ჩვეულებრივი. ასეთ ვითარებაში გასაკვირი არ არის, რომ ტოვებენ მის პარტიას წევრები.
ეს საბოლოოდ მეტყველებს იმაზე, რომ ამ სუბიექტს არანაირი რესურსი არ აქვს, რათა რამე წარმატებას მიაღწიოს. როცა ხარ გადამგდები და შეგიძლია საკუთარი თანაპარტიელი ვალებში გადააგდო, რომელ წარმატებაზეა საუბარი. ამ კაცმა ავტომობილები და ბინები გააყიდვინა პარტიის წევრებს არჩევნების წინ და მერე გადააგდო. ჰპირდებოდა სამმაგად ფულის დაბრუნებას და გადააგდო" - ამბობს ირაკლი კობახიძე.
