„ივანიშვილი უნდა მოიქცეს, როგორც ჭეშმარიტი ქველმოქმედი და სააკაშვილს უპასუხოს სულის შემძვრელი სიკეთით“ - იაგო ხვიჩია

„ვიდრე ჩვენ ვერ მოვახერხებთ იმას, რომ ქართული პოლიტიკის ორ მთავარ მოთამაშეს – ბატონ ბიძინას და სააკაშვილს არ შევარიგებთ, მანამდე ასეთი პროექტების მიმართ დიდი წარმატების იმედი არ უნდა გვქონდეს“, – ამის შესახებ პარტია „გირჩის“ დეპუტატმა, იაგო ხვიჩიას განაცხადა.

აღნიშნულით მან ევროკავშირის ცხრა რეკომენდაციის შესრულებასთან დაკავშირებით ისაუბრა და თქვა, რომ მისი პარტია ნებისმიერ პროცესში მონაწილეობას მიიღებს, რაც მათ შორის დეპოლარიზაციას ხელს შეუწყობს.

ხვიჩიას თქმით, მთავარია დეპოლარიზაცია, რომელიც მიიღწევა მხოლოდ მაშინ, თუ მიხეილ სააკაშვილს ქვეყნის პოლიტიკაში ღიად ჩართვის საშუალება მიეცემა.

„პარლამენტში ერთხელ უკვე ვნახეთ, როგორ სრულდებოდა 12 პუნქტი, თუმცა ახლა პოლიტიკაში ბიძინა ივანიშვილია, რომელიც ცხრა პუნქტის შესრულებას თავის ხელს დაატყობს თუ არა, არ ვიცით, მაგრამ ჩვენ ნებისმიერ პროცესში მივიღებთ მონაწილეობას, რადგან, ვაითუ, ბატონმა ბიძინამაც გადაწყვიტოს ამ პროცესში ჩართულობა და ჩვენ რომ იქ არ ვიყოთ, მხოლოდ დანარჩენი ოპოზიციის იმედად ხეირიანს ვერაფერს მივიღებთ.

შესაბამისად, ყველაფერში ჩავერთვებით. ვიდრე ჩვენ ვერ მოვახერხებთ იმას, რომ ქართული პოლიტიკის ორ მთავარ მოთამაშეს – ბატონ ბიძინას და სააკაშვილს არ შევარიგებთ, მანამდე ასეთი პროექტების მიმართ დიდი წარმატების იმედი არ უნდა გვქონდეს, რადგან ჩვენ გვითხრეს, მთავარი დეპოლარიზაცია არისო.

მისი შესრულება ახალი რეგულირებებით, შეზღუდვებით, სააკაშვილის საავადმყოფოდან ციხეში გადაყვანით და ა.შ. არ გამოვა. გამოსავალს მხოლოდ შერიგებაში ვხედავთ.

შერიგებაა ის, რომ ამ ქვეყანაში საკუთარი თავი ორივემ უნდა დაინახოს და ორივეს ჰქონდეს პოლიტიკური მუშაობის საშუალება, რადგან, მოგეხსენებათ, რომ ორივეს პოლიტიკაში ყოფნა უნდათ ან უწევთ.

აქედან გამომდინარე, მგონია, რომ ბატონი ბიძინა უნდა მოიქცეს, როგორც ჭეშმარიტი ქველმოქმედი და მიხეილ სააკაშვილს სულის შემძვრელი სიკეთით და ქველმოქმედებით უპასუხოს. ეს იქნება ნაბიჯი დეპოლარიზაციისკენ.

საბოლოო ჯამში, სიკეთე და ქველმოქმედება აისახება იმაში, რომ მიხეილ სააკაშვილს მიეცეს საშუალება, ქვეყნის პოლიტიკაში ჩაერთოს ღიად, არა „ვივამედიდან“, არამედ როგორც პოლიტიკოსს შეეფერება.

მესმის, ასეთი ნაბიჯების გადადგმა ერთ დღეში არ მოხდება, მაგრამ თუ გვინდა დეპოლარიზაცია და პოლიტიკური ცხოვრების თავის ჩარჩოებში მოქცევა, როგორც ბატონი ბიძინა დაბრუნდა პოლიტიკაში, ჩემი აზრით, ასევე უნდა დაბრუნდეს პოლიტიკაში სააკაშვილიც.

დანარჩენი პოლიტიკური ძალები კი, რომლებიც ხან „ქართული ოცნების“ სახელით ლაპარაკობენ, ხან – „ნაცების“, ამ ორმა ლიდერმა უნდა შეიწოვონ.

ბიძინა ივანიშვილი თუ მართლა სერიოზულად ბრუნდება, ეს დაბრუნება წინა დაბრუნებასავით არ უნდა იყოს, რომ შემდეგ ისევ მოუგვარებელი საკითხები დარჩეს და კაცს პენსიიდან უკან დაბრუნება უწევს“. – განაცხადა იაგო ხვიჩიამ.