„კოკო გამსახურდიას პროცესში შემოყვანით არის მცდელობა, „ინადირონ“ პირველი პრეზიდენტის მომხრეების ხმებზე“ - პაატა მანჯგალაძე

„ქართულ ოცნებას“ ელექტორალურად ძალიან უჭირს. პირველი პრეზიდენტის ვაჟის, კოკო გამსახურდიას ეროვნულ ბიბლიოთეკაში მოყვანით არის მცდელობა იმისა, რომ „ინადირონ“ პირველი პრეზიდენტის მომხრეების ხმებზე,“ – ამის შესახებ „სტრატეგია აღმაშენებლის“ წევრმა, პაატა მანჯგალაძემ „პალიტრანიუსის“ეთერში განაცხადა.

„პარლამენტის თავმჯდომარის იმ განცხადებით, რომელიც ვნახეთ, მგონი, „ქართულმა ოცნებამ“ თვითლუსტრაცია მოახდინა.

როგორც განცხადებიდან ვიცით, ადამიანს უთხრა კარგად მუშაობ, მაგრამ ახლა, სიახლის და განახლების დრო არისო. ისინი 12 წელია [„ქართული ოცნება“] ცუდად მუშაობენ და ჩვენც იმას ვამბობთ, რომ პოლიტიკურად განახლების დრო არის.

რაც შეეხება გიორგი კეკელიძეს, შემიძლია უდიდესი პატივისცემა გამოვხატო, ამ მიმართულებით ძალიან დიდი რეფორმები ჩაატარა, ის არის ნიჭიერი ადამიანი. რა თქმა უნდა, პოლიტიკას ვუკავშირებ.

კოკო გამსახურდიას ბიბლიოთეკის თავმჯდომარის თანამდებობაზე წარდგენას, რა თქმა უნდა, სხვა მიზანი არ აქვს იმიტომ, რომ მე არ მინახავს კოკო გამსახურდიას რამე იდეა ჰქონოდეს იმაზე დიდი ბიბლიოთეკასთან დაკავშირებით.

ამაზე მეტს კოკოზე არ ვილაპარაკებ იმიტომ, რომ ზვიად გამსახურდია ჩემთვის არის სიმბოლო პატრიოტიზმის, ეროვნულობის, მამულიშვილობის და მის ოჯახზე და შვილზე ნეგატიურად მეტს არ ვისაუბრებ, ამ ეტაპზე, არც მაქვს ამის საფუძველი,“ – განაცხადა პაატა მანჯგალაძემ.