პარიზში ათასობით ადამიანი ახალი საიმიგრაციო კანონის გასაპროტესტებლად გამოვიდა
პარიზის ქუჩებში ათასობით ადამიანი ახალი საიმიგრაციო კანონის გასაპროტესტებლად გამოვიდა. მსვლელობაში ის უცხოელებიც მონაწილეობდნენ, რომლებსაც საფრანგეთში სამუშაოდ საჭირო დოკუმენტები არ აქვთ.
ქვეყნის პარლამენტმა დეკემბერში დაამტკიცა საიმიგრაციო პოლიტიკის გამკაცრების კანონი, რომელიც საფრანგეთში არალეგალურად ჩასული მიგრანტების დეპორტაციას ამარტივებს და სოციალური დახმარების მიღებას ართულებს. ახალი წესებით ძნელდება მიგრანტების მიერ ოჯახის წევრების საფრანგეთში ჩაყვანა.
კანონპროექტი ასევე ითვალისწინებს საფრანგეთის მოქალაქეობის ჩამორთმევას ორმაგი მოქალაქეობის მქონე იმ პირებისთვის, რომლებმაც სამართალდამცავი ორგანოების წინააღმდეგ დანაშაული ჩაიდინეს.
