"მგონი ძალიან მეტყობა, რომ ბევრი ვიტირე... ჩემი და "ფორმულას" თანამშრომლობა დასრულდა" - რას ამბობს თათია შარანგია მისი გადაცემის დახურვის შემდეგ? (ვიდეო)
"ფორმულაზე" გასართობი გადაცემები იხურება. ცოტა ხნის წინ ცნობილი გახდა, რომ ტელეკომპანიაზე "ნიკა არაბიძის შოუ“ დაიხურა, გუშინ კი ია ფარულავამ და თათია შარანგიამ სოციალური ქსელის საშუალებით მაყურებელს უთხრეს, რომ მათი გადაცემებიც აღარ გავა ეთერში.
"მე მგონი ძალიან მეტყობა, რომ დასიებული თვალები მაქვს, იმიტომ რომ ძალიან ბევრი ვიტირე. ემოციური ადამიანი ვარ, არ ვიცი, ეს ჩემი ნაკლია თუ დადებითი თვისება.
არ მეგონა, რომ ამაზე მომიწევდა თქვენთან საუბარი. ჩემი და "ფორმულას" თანამშრომლობა დასრულდა. „სთორი“ აღარ გავა "ფორმულას" ეთერში. ჩემთვის ეს ერთი დიდი ეპოქის დასასრულია, იმიტომ რომ ფორმულა არის ჩემთვის ოჯახი, სადაც "სთორიმ" ფეხი აიდგა, "სთორი" შეიყვარეს, მიიღეს. ჩვენც ბევრი გავაკეთეთ, რომ "ფორმულა" ყოფილიყო მოწოდების სიმაღლეზე.
ვგულისხმობ იმას, რომ ჩვენი მაქსიმუმი გავაკეთეთ. ახლა, დღეს, ეს ყველაფერი დასრულდა და ჩემთვის არის ძალიან მტკივნეული, მაგრამ მე ვარ ასეთი ადამიანი, დღეს ძალიან ბევრს ვიტირებ, ხვალ გავიღვიძებ ძალიან შემართებით და მივხვდები თუ სად არის ჩემი ადგილი. "სთორი" აუცილებლად მოგესალმებათ სხვა პლატფორმიდან", - ამბობს თათია შარანგია.
