ვინ არის "ნაპოლის“ ახალი მთავარი მწვრთნელი?
„ნაპოლიმ“ მთავარ მწვრთნელად ფრანჩესკო კალცონას დანიშვნა ოფიციალურად დაადასტურა.
„პარტენოპეიმ“ განცხადება სოციალურ ქსელში გაავრცელა. 55 წლის სპეციალისტმა მთავარი მწვრთნელის პოსტზე ვალტერ მაცარი ჩაანაცვლა, რომელიც აურელიო დე ლაურენტისმა ცოტა ხნის წინ წარუმატებელი შედეგის გამო გაათავისუფლა.
გავრცელებული ინფორმაციით, კალცონამ „ნაპოლისთან“ კონტრაქტი მიმდინარე სეზონის ბოლომდე გააფორმა.
იტალიელი სპეციალისტი ბოლოს სლოვაკეთის ნაკრებში, ტექნიკური კომისარის თანამდებობაზე მუშაობდა, მანამდე კი რამდენიმე იტალიურ გუნდს წვრთნიდა.
რაც შეეხება ვალტერ მაცარის, ის „ნაპოლის“ მთავარ მწვრთნელად გასული წლის ნოემბერში დაინიშნა და ამ პოსტზე რუდი გარსია ჩაანაცვლა. იტალიელ მწვრთნელს აურელიო დე ლაურენტისი სოციალური ქსელით დაემშვიდობა:
„მადლობას ვუხდი ვალტერ მაცარის, დე ლაურენტისების ოჯახის მეგობარს „ნაპოლისთვის“ რთულ მომენტში მხარდაჭერისთვის. ის სამუდამოდ დარჩება ნეაპოლიტანელთა და ჩვენი ოჯახის გულებში. კეთილი იყოს შენი მობრძანება ფრანჩესკო კალცონა. ის უკვე მუშაობდა ჩვენთან ჯერ სარისთან, შემდეგ კი სპალეტისთან“, - წერს დე ლაურენტისი.
Ringrazio Walter Mazzarri, amico della famiglia De Laurentiis e del Napoli, per aver sostenuto la squadra in un momento complesso. Resterà nel cuore dei napoletani e della nostra famiglia. Bentornato a Francesco Calzona, che ha già lavorato con noi sia con Sarri che con Spalletti — AurelioDeLaurentiis (@ADeLaurentiis) February 19, 2024
