ჯორჯ სოროსმა რადიოს უდიდესი ქსელი შეიძინა
მილიარდერმა აქტივისტმა ინვესტორმა, ჯორჯ სოროსმა ამერიკის შეერთებული შტატების მასშტაბით რადიოს უდიდესი ქსელი, Audacy შეიძინა, რომელიც 230 არხსა და სადგურს აერთიანებს.
აღნიშნული კომპანია ქვეყანაში ერთ-ერთ ყველაზე პოპულარულ ტალღას, WEEI-ს ფლობს, რომელსაც ყოველდღიურად მილიონობით ადამიანი უსმენს.
Audacy-ის შესყიდვა სოროსის მხრიდან გასაკვირი არ არის, რადგან მისი საინვესტიციო ფონდი 130-მდე ტელევიზიას, ჟურნალსა და მედიასაშუალებას აერთიანებს, შესაბამისად, რადიოს მიმართულებით მისი პორტფელის გაფართოება მოსალოდნელიც იყო.
რაც შეეხება უშუალოდ Audacy-ს, ბოლო 20 წლის განმავლობაში კომპანიამ თავისი კაპიტალიზაციის 99.9% დაკარგა, რაც არასწორი მენეჯმენტით და სტრიმინგსერვისების, მათ შორის, Spotify-ს და Apple Music-ის განვითარებით იყო განპირობებული. ამჟამად კომპანია გაკოტრებულია და მას 2 მილიარდი დოლარის ვალდებულებების მომსახურება არ შეუძლია, სწორედ ამიტომ ინვესტორებმა მისი გასხვისების გადაწყვეტილება მიიღეს, დაინტერესებული მხარე კი სოროსი აღმოჩნდა, რომელსაც ახლა უკვე საპრეზიდენტო არჩევნების წელს თავის განკარგულებაში 230 რადიოსიხშირე ექნება.
