"მითხრეს, რომ რუსეთის და საქართველოს მტერი ვარ" - საქართველოში რუსი აქტივისტი არ შემოუშვეს
ვლადიმერ პუტინის კრიტიკოსისა და მოწინააღმდეგის, ბორის ნადეჟდინის 2 მხარდამჭერი, რომელიც ნადეჟდინს რუსეთის საპრეზიდენტო არჩევნებისთვის ხელმოწერების შეგროვებაში ეხმარებოდნენ, საქართველოში არ შემოუშვეს. მათგან ერთ-ერთი, მაქსიმ ივანცოვი დარწმუნებულია, რომ მისი საქართველოში არშემოშვება სწორედ ბორის ნადეჟდინისთვის ხელმოწერების შეგროვებასთან არის კავშირში.
"არ შემიშვეს იმის გამო, რომ ჩვენ დავთმეთ სივრცე ბორის ნადეჟდინისთვის ხმების შესაგროვებლად. მხოლოდ მე არ შემექმნა პრობლემები ხელმოწერების შეგროვების შემდეგ. დიდი ხანია შესამჩნევია, რომ საქართველოს ხელისუფლება მტკივნეულად რეაგირებს არა მხოლოდ ქართულ პოლიტიკასთან დაკავშირებით საჯარო განცხადებებზე, არამედ რუს ანტიპუტინისტ აქტივისტებზეც", - განაცხადა მან.
მისი თქმით, საქართველოში ჩამოსვლისთანავე მას ჩაურტყეს საზღვარზე ბეჭედი, თუმცა შემდეგ სთხოვეს რომ უკან დაბრუნებულიყო საპასპორტო კონტროლზე.
"მომაჩეჩეს ფურცელი საქართველოში არშეშვებაზე და ხელის კვრით და უხეშად საუბრით, ცვლის უფროსმა და კიდევ რამდენიმე პოლიციის თანამშრომელმა მიბიძგა და წამიყვანა თვითმფრინავისკენ", - აცხადებს ივანცოვი.
ივანცოვი ამბობს, რომ საზღვარზე პოლიციელები რეგულარულად მიდიოდნენ და მასზე ზეწოლას ახდენდნენ, რომ გაფრენილიყო. მისი თქმით, არ მისცეს არც ადვოკატთან გასაუბრების შესაძლებლობა. ასევე ამბობს, რომ დაემუქრდნენ. "მეუბნებოდნენ, რომ ვარ რუსეთის და საქართველოს მტერი, საქართველო კი ისინი არიან". ივანცოვი წერს, რომ მხოლოდ დილას "დანებდა და გაფრინდა" უნგრეთში.
ივანცოვი ამბობს, რომ კვლავ შეეცდება საქართველოში შემოსვლას. ასევე აღნიშნავს, რომ გაასაჩივრებს გადაწყვეტილებას და იმ მოპყრობას, რომელიც საზღვარზე პოლიციელების მხრიდან მიიღო. ის ამბობს, რომ ადამიანის უფლებათა ევროპულ სასამართლოსაც მიმართავს.
